ԱՄՆ կառավարության արդյունավետության դեպարտամենտի նախկին տնօրեն Իլոն Մասկը և ԱՄՆ ֆինանսների նախարար Սքոթ Բեսենթը Սպիտակ տանը կռվի են բռնվել։ Վիճաբանությունն սկսվել է Ներքին եկամուտների ծառայության (IRS) ղեկավարի պաշտոնի թեկնածության շուրջ անհամաձայնությունների պատճառով։ Այս մասին The Washington Post-ին տված հարցազրույցում հայտնել է ԱՄՆ նախագահ Դոնալդ Թրամփի նախկին խորհրդական Սթիվեն Բենոնը։
Ինչպես նշում է հրատարակությունը, միջադեպը տեղի է ունեցել ապրիլին՝ Մասկի և Բեսենթի՝ Թրամփի հետ հանդիպման ժամանակ, որի ընթացքում քննարկվել է IRS-ի ղեկավարի պաշտոնի համար թեկնածուների հարցը։ Նախագահը աջակցել է ֆինանսների նախարարի առաջարկներին։
Բեննոնի խոսքով՝ Բեսենթը և Մասկը Օվալաձև աշխատասենյակից դուրս գալուց և միջանցքով իջնելուց հետո սկսել են վիրավորել իրար։ Բեսենթը հիշատակել է Մասկի հայտարարությունները, որ կբացահայտի ավելի քան 1 տրիլիոն դոլարի իռացիոնալ և խարդախ պետական ծախսեր, ինչը Մասկը չի արել։«Սքոթը [Բեսենթը] ասաց. «Դու խաբեբա ես։ Դու լրիվ խաբեբա ես», - ասել է Բենոնը հարցազրույցի ժամանակ։
Այնուհետև Մասկը, ըստ Բենոնի, ուսով հարվածել է Բեսենթի կրծքին, «ինչպես ռեգբի խաղացող», և Բեսենթը պատասխանել է նրան։ Մի քանի մարդ միջամտել է՝ կռիվը դադարեցնելու համար, երբ նրանք հասել էին ազգային անվտանգության խորհրդականի գրասենյակ, և Մասկին դուրս են հանել Արևմտյան թևից։
«Նախագահ Թրամփը լսել է դրա մասին և ասել. «Սա արդեն շատ–շատ է», - հավելել է Բենոնը։
