Առաջիկա օրերին սպասվում է ՌԴ–ի կողմից հզոր ու բազմակողմանի հարձակում Ուկրաինայի վրա․ Reuters

08.06 10:00 | Կատեգորիա Համաշխարհային

ԱՄՆ–ում ենթադրում են, որ Ռուսաստանը կարող է ավելի հզոր հարված հասցնել Ուկրաինային՝ ի պատասխան իր ռազմավարական ավիաբազաների վրա անօդաչու թռչող սարքերի հարձակման: Ամերիկացի պաշտոնյաների խոսքով՝ Կրեմլը դեռևս լիովին չի արձագանքել «Սարդոստայն» (Паутина) գործողությանը, ուստի մոտ ապագայում հնարավոր է լինի «բազմակողմանի հարձակում», որը կարող է ներառել Ուկրաինայի անվտանգության ծառայության ենթակառուցվածքները։

Այս մասին կիրակի՝ հունիսի 8-ին, հայտնել է Reuters –ը՝ հղում անելով աղբյուրներին։

Ըստ հոդվածի՝ Ռուսաստանի կողմից հնարավոր հարվածի ժամկետները մնում են անհայտ, սակայն հարձակումը կարող է տեղի ունենալ առաջիկա օրերին: Պաշտոնյաներից մեկը նշել է, որ Կրեմլի պատասխանը կներառի օդային հարվածի տարատեսակ միջոցներ, այդ թվում՝ հրթիռների և անօդաչու թռչող սարքերի կիրառում։

Reuters–ի հետ զրուցած պաշտոնյաները չեն բացահայտել հարձակման հավանական թիրախները և ձեռնպահ են մնացել հետախուզական տվյալների վերաբերյալ մեկնաբանություններից: Միևնույն ժամանակ, զրուցակիցներից մեկը ընդգծել է, որ դա «ասիմետրիկ» պատասխան է լինելու, այսինքն՝ պարտադիր չէ, որ լինի հայելային արձագանք ուկրաինական անօդաչու թռչող սարքերի կողմից ռուսական ինքնաթիռների վրա հարձակմանը։

Ամերիկացի պաշտոնյաները կարծում են, որ հունիսի 6-ի գիշերային հրետակոծությունը ռուսական լայնածավալ պատասխանի միայն սկիզբն էր, և գործողությունների հիմնական փուլը դեռ առջևում է։

Արևմտյան դիվանագետներից մեկը կարծիք է հայտնել, որ հարձակումներ կարող են լինել սիմվոլիկ թիրախների վրա, մասնավորապես՝ կառավարական շենքերի՝ Ուկրաինայի կառավարության վրա ճնշում գործադրելու համար: Մեկ այլ պաշտոնյա կանխատեսել է, որ հարվածները կլինեն ինտենսիվ, ավերիչ և երկարատև:

Կոնջորյանն ընդդիմությանը մեղադրեց ՀՀ–ում ահաբեկչության միջոցով իշխանության զավթմանն աջակցելու մեջ (տեսանյութ)