Հնդկաստանի վարչապետ Նարենդրա Մոդին բացել է աշխարհի ամենաբարձր երկաթուղային կամուրջը, որը անցնում է Ջամմուի և Քաշմիրի հյուսիսային միութենական տարածքում գտնվող Չենաբ գետի վրայով, հաղորդում է Hindustan Times-ը։
«Չենաբ գետի վրայով անցնող կամուրջը, որն առաջին անգամ երկաթուղով կկապի Ջամմուն և Քաշմիրը Հնդկաստանի մնացած մասի հետ, կնպաստի տարածաշրջանում տրանսպորտային ենթակառուցվածքների և զբոսաշրջության ոլորտի զարգացմանը», – ասել է կառավարության ղեկավարը բացման արարողության ժամանակ։
«Այս մեծ իրադարձությունը խորհրդանշում է Հնդկաստանի ժողովրդի միասնությունն ու կամքը»,-նշել է նա։
Կամուրջը կառուցված է Չենաբ գետի վրա՝ Հիմալայների նախալեռներում, գետի հունից բարձրությունը 359 մ է, իսկ ջրի միջին մակարդակից (գետը փոխում է իր մակարդակը՝ կախված եղանակից) բարձրությունը առնվազն 322 մ է, ինչը այս կամուրջը դարձնում է մոլորակի ամենաբարձր երկաթուղային կամուրջը։
Նոր կամուրջը նախագծված է դիմակայելու Քաշմիրում տարածված երկրաշարժերին, ինչպես նաև մինչև 74 մ/վ արագությամբ քամու պոռթկումներին: 1.3 կմ երկարությամբ կառույցն ունի 467 մ կենտրոնական թռիչք: Գլխավոր կամարի թռիչքը տեղադրելու համար օգտագործվել է աշխարհի ամենաերկար մալուխային կռունկը:
Կամրջի բացումը նախատեսված էր 2019 թվականին, սակայն մի շարք պատճառներով շինարարության ավարտը հետաձգվեց, այդ թվում՝ կորոնավիրուսի համավարակի պատճառով։
