ՄԱԿ-ի գլխավոր քարտուղար Անտոնիո Գուտերեշը կարող է մասնակցել Ռուսաստանի և Ուկրաինայի միջև հնարավոր խաղաղության համաձայնագրի կետերի մշակմանը։ Այս կարծիքը հայտնել է Բրազիլիայի նախագահ Լուիս Ինասիու Լուլա դա Սիլվան, ով արդեն իսկ Ֆրանսիայի ղեկավար Էմանուել Մակրոնին տեղեկացրել է այս նախաձեռնության մասին։
«Երեկ ես Մակրոնին առաջարկեցի խոսել ՄԱԿ-ի գլխավոր քարտուղար Գուտերեշի հետ, ով կարող է այցելել Ռուսաստան և Ուկրաինա բանակցություններ վարելու և ստորագրման համար պատրաստ համաձայնագրի կետեր մշակելու համար», – ասել է պետության ղեկավարը Ֆրանսիա կատարած այցից հետո մամուլի ասուլիսում։
Լուլա դա Սիլվան հավելել է, որ երկու կողմերն էլ կարող են հույս դնել Բրազիլիայի միջնորդության վրա Ուկրաինայում խաղաղության հասնելու գործում։
Ավելի վաղ Բրազիլիայի առաջնորդը Ռուսաստանի նախագահ Վլադիմիր Պուտինին առաջարկել էր իր օգնությունը որպես միջնորդ հակամարտության կարգավորման բանակցություններում։
