Ցերեկային լույսը օգնում է իմունային համակարգին պայքարել ինֆեկցիաների դեմ

Օքլենդի համալսարանի (Նոր Զելանդիա) գիտնականները պարզել են, որ ցերեկային լույսը կարող է բարելավել իմունային համակարգի՝ ինֆեկցիաների դեմ պայքարելու ունակությունը։ Հետազոտությունը հրապարակվել է Science Immunology (SciIm) ամսագրում։

Գիտնականները կենտրոնացել են նեյտրոֆիլների վրա՝ ամենամեծ թվով իմունային բջիջների, որոնք առաջինն են արձագանքում բորբոքմանը և ոչնչացնում վնասակար մանրէներն ու այլ հարուցիչները։ Դրանց վարքագիծը դիտարկելու համար հետազոտողները օգտագործել են մոդելային օրգանիզմ՝ քաղցրահամ ջրերի ձկների թափանցիկ տեսակ, որը կոչվում է զեբրաձուկ։ Մարդկանց հետ իրենց գենետիկ նմանության և կենսաբանական գործընթացները իրական ժամանակում պատկերացնելու հնարավարության շնորհիվ այս կենդանիները դարձել են իդեալական փորձարկվողներ։

Ինչպես բացատրել է ուսումնասիրության գլխավոր հեղինակ, դոցենտ Քրիստոֆեր Հոլը, նախկինում նկատվել է, որ իմունային պատասխանը գագաթնակետին է հասնում առավոտյան ժամերին՝ օրգանիզմի կյանքի ակտիվ փուլի սկզբում։ Գիտնականի խոսքով՝ սա կարող է պայմանավորված լինել էվոլյուցիոն մեխանիզմով. ցերեկային ժամերին հարուցիչների հետ հանդիպելու հավանականությունն ավելի բարձր է, և օրգանիզմը պետք է պատրաստ լինի դրան։

Նոր աշխատանքը օգնել է բացահայտել, որ նեյտրոֆիլներն ունեն իրենց սեփական ցիրկադային ժամացույցը՝ ներքին կենսաբանական մեխանիզմ, որը զգայուն է ցերեկային և գիշերային փոփոխության նկատմամբ: Դրանք ցերեկային լույսի ազդեցությամբ ակտիվացնում են բջիջները և բարելավում դրանց՝ մանրէները ոչնչացնելու ունակությունը։

«Քանի որ նեյտրոֆիլները բորբոքման օջախ ժամանող առաջին բջիջներն են, մեր հայտնագործությունը կարող է կարևոր նշանակություն ունենալ բորբոքային հիվանդությունների բուժման համար», - ասել է Հոլը։ Գիտնականները հույս ունեն, որ ապագայում այս հայտնագործությունները կօգնեն մշակել նոր բուժումներ, որոնք ուղղված կլինեն իմունային պաշտպանությունը բարձրացնելուն՝ ցիրկադային ռիթմերի կարգավորման միջոցով։