Ճապոնիայի արտաքին գործերի նախարարությունը իր խիստ բողոքն է հայտնել Իսրայելին իսրայելցի զինվորականների կողմից Ջենինում պաղեստինցի փախստականների ճամբար այցելող օտարերկրյա դիվանագետների խմբի վրա կրակ բացելու կապակցությամբ, որոնց թվում էին նաև ճապոնացիներ։
Այս մասին լրագրողներին հայտնել է Ճապոնիայի արտաքին գործերի նախարար Տակեշի Իվայան։
«Սա բացարձակապես անընդունելի և դատապարտելի էր։ Մենք վճռական բողոք ենք ներկայացրել և պահանջել ենք ձեռնարկել անհրաժեշտ ամեն ինչ՝ նման միջադեպերը չկրկնելու համար», - նշել է նա հերթական մամուլի ասուլիսի ժամանակ։
Իվայան ընդգծել է, որ միջադեպի հետևանքով Ճապոնիայի քաղաքացիներ չեն տուժել։ Նրա խոսքով՝ իսրայելական կողմը դիվանագիտական ուղիներով ափսոսանք է հայտնել միջադեպի կապակցությամբ։
Ինչպես ավելի վաղ հայտնել էր պաղեստինյան WAFA լրատվական գործակալությունը, իսրայելցի զինվորները ինտենսիվ կրակ են բացել Արևմտյան ափին գտնվող Ջենին ժամանած դիվանագիտական պատվիրակության և խմբին ուղեկցող լրագրողների վրա։
