Չինաստանը աջակցում է Ռուսաստանի և Ուկրաինայի միջև ուղիղ բանակցություններին՝ հուսալով, որ դրանք կհանգեցնեն արդար և կայուն խաղաղության։ Այս մասին ճեպազրույցում հայտարարել է Չինաստանի ԱԳՆ պաշտոնական ներկայացուցիչ Մաո Նինգը։
«Չինաստանն աջակցում է բոլոր ջանքերին, որոնք նպաստում են Ուկրաինայում խաղաղությանը: Չինաստանը աջակցում է Ռուսաստանի և Ուկրաինայի միջև ուղիղ երկխոսությանը և բանակցություններին, ինչպես նաև ներկայիս ճգնաժամի քաղաքական լուծմանը:
Չինական կողմը հույս ունի, որ բանակցությունների միջոցով կողմերը կկարողանան հասնել արդար, երկարաժամկետ և պարտավորեցնող խաղաղ համաձայնագրի, որը կընդունվի երկու կողմերի կողմից»,- նշել է դիվանագետը։
