Հունգարիայի խորհրդարանը վերջնական հավանություն է տվել Միջազգային քրեական դատարանից (ՄՔԴ) երկրի դուրս գալու մասին օրինագծին։ Քվեարկության ժամանակ, որը հեռարձակվել է օրենսդիր մարմնի կայքում, պատգամավորների ավելի քան երկու երրորդը կողմ է քվեարկել փաստաթղթին։
Օրինագծի վերջնական քվեարկությանը նախորդել էին ապրիլի վերջին խորհրդարանում բուռն քննարկումները։ Դեռ այն ժամանակ նրա օգտին էին արտահայտվել իշխող «Ֆիդես-Հունգարական քաղաքացիական միություն» կուսակցության բոլոր պատգամավորները և նրանց կրտսեր գործընկերները՝ Քրիստոնեա-դեմոկրատները։ Դրան դեմ էին ընդդիմադիր լիբերալ դեմոկրատական կուսակցությունների ներկայացուցիչները։
Փաստաթուղթը խորհրդարանում ներկայացնելով՝ Հունգարիայի արտգործնախարար Պետեր Սիյարտոն ասել է, որ վերջին տարիներին ՄՔԴ-ն խիստ քաղաքականացվել է և սկսել է օգտագործվել տարբեր պետությունների կողմից՝ միջազգային հակամարտություններում իրենց նպատակներին հասնելու համար։ «Հունգարիան կարծում է, որ քաղաքականությունն ու աշխարհաքաղաքականությունը տեղ չունեն միջազգային իրավական կազմակերպություններում»,- ասել է նախարարը։
Հունգարիայի կառավարությունը ՄՔԴ-ից երկրի դուրս գալու մասին հայտարարեց ապրիլի սկզբին։
