Իրանը երբեք չի հրաժարվի խաղաղ նպատակներով ուրանի հարստացումից: Այս մասին հայտարարել է Իսլամական Հանրապետության Մեջլիսի (խորհրդարանի) արտաքին քաղաքականության և ազգային անվտանգության հանձնաժողովի ներկայացուցիչ Էբրահիմ Ռեզայը։
«Իրանը ոչ մի դեպքում չի հրաժարվի ուրանի հարստացումից և միջուկային տեխնոլոգիաներից»,- ասել է խորհրդարանականը SNN-ին։ Մայիսի 18-ին ԱՄՆ նախագահի հատուկ բանագնաց Սթիվեն Ուիթքոֆը ասել է, որ Թեհրանը չի կարող շարունակել ուրանի հարստացումը, քանի որ դա կարող է հանգեցնել միջուկային զենքի ստեղծմանը:
«Միջուկային էներգիան կենսական նշանակություն ունի մեր երկրի համար: Այս տեխնոլոգիաները ոչ միայն առանցքային դեր են խաղում Իրանի բժշկական և արդյունաբերական կարիքները բավարարելու համար, այլև կարևոր զսպիչ միջոց են արտաքին սպառնալիքների դեմ: Հետևաբար, այս հարցի շուրջ բանակցություններ կամ գործարքներ հնարավոր չեն»,- հավելել է Ռեզաին:
