ՌԴ Անվտանգության խորհրդի փոխնախագահ Դմիտրի Մեդվեդևն ասել է, որ խաղաղ բանակցություններն ինքնին միշտ չէ, որ հանգեցնում են մարտերի դադարեցմանը, և եթե դրանք ձախողվեն, կարող են հանգեցնել հակամարտության «ավելի սարսափելի փուլի»՝ նոր սպառազինություններով և նոր մասնակիցներով։
«Ռուսաստանի բոլոր թշնամիները, ովքեր վերջնագրեր են դնում բանակցությունների մասին, պետք է հիշեն մի պարզ բան. խաղաղ բանակցություններն ինքնին միշտ չէ, որ հանգեցնում են ռազմական գործողությունների ավարտին: Անհաջող բանակցությունները կարող են հանգեցնել պատերազմի ավելի սարսափելի փուլի սկզբին նոր զենքերով և նոր մասնակիցների հետ»,- գրել է Մեդվեդևը X սոցիալական ցանցի իր էջում։
Ավելի վաղ Ֆրանսիայի նախագահ Էմանուել Մակրոնը, Գերմանիայի կանցլեր Ֆրիդրիխ Մերցը, ինչպես նաև Մեծ Բրիտանիայի և Լեհաստանի վարչապետներ Քիր Սթարմերը և Դոնալդ Տուսկը Կիևում մասնակցել են այսպես կոչված կամավորների կոալիցիայի հանդիպմանը։
Մակրոնը և Մերցը նշել են, որ մի քանի օրվա ընթացքում Ռուսաստանի դեմ պատժամիջոցների նոր փաթեթ կարող է կիրառվել, եթե Մոսկվան չընդունի Արևմուտքի առաջարկած 30-օրյա հրադադարի պայմանները, չնայած այն հանգամանքին, որ Կիևի ռեժիմը խախտել է բոլոր հրադադարները և դեռ չի հանել Ռուսաստանի հետ բանակցությունների արգելքը։
