Թեհրանը պատերազմի չի ձգտում, նա կշարունակի բանակցությունները ԱՄՆ-ի հետ միջուկային հարցի շուրջ և չի վախենում այն սպառնալիքներից, որոնք ամերիկացի նախագահը փոխարինում է խաղաղության հրավերներով, ասել է Իրանի նախագահ Մասուդ Փեզեշքիանը, ում խոսքերը մեջբերում է Mehr գործակալությունը։
Ավելի վաղ ԱՄՆ նախագահ Դոնալդ Թրամփը հայտարարել էր, որ Իրանը պետք է արագ գործի միջուկային նոր համաձայնագրի հասնելու համար՝ հավելելով, որ «ինչ-որ վատ բան տեղի կունենա», եթե դա չանի:
«Մենք կբանակցենք։ Մենք չենք ձգտում պատերազմ։ Այնուամենայնիվ, մենք չենք վախենում որևէ սպառնալիքից», – Իրանի նախագահի խոսքերն է մեջբերում Mehr գործակալությունը։
Փեզեշքիանը նշել է, որ Թրամփի խոսքերում հակասություններ կան. նա երբեմն Իրանին հրավիրում է խաղաղության, երբեմն էլ սպառնում է ԱՄՆ-ի մշակած կործանման միջոցներով, ուստի, անհասկանալի է, թե ԱՄՆ նախագահի որ հայտարարություններին հավատալ։
