Ամերիկյան Լաս Վեգաս քաղաքի մարզադահլիճում հրաձգություն է տեղի ունեցել, ինչի հետևանքով երկու մարդ մահացել է, այդ թվում՝ հանցագործության մեջ կասկածվողը, չորսը՝ վիրավորվել են, հայտնում է տեղի ոստիկանությունը։
Ինչպես Լաս Վեգասի ոստիկանության կապիտան Էսմերալդա Բովեդան նշել է ոստիկանության YouTube ալիքի տեսանյութում, միջադեպը տեղի է ունեցել ուրբաթ կեսօրին։ Դեպքի վայր ժամանած իրավապահները մարզասրահի դռան մոտ հայտնաբերել են հրազենով տղամարդու։ Տղամարդը դուրս է վազել շենքից, սակայն ոստիկանները կրակ են բացել նրա վրա, ապա բերման ենթարկել։
«Բժիշկները ժամանել են միջադեպի վայր և կասկածյալին տեղափոխել են հիվանդանոց, որտեղ նա ավելի ուշ մահացել է։ Երեք տուժած հոսպիտալացվել է, նրանցից մեկի վիճակը ծանր է»,- ասել է Բովեդան։
Մեկ այլ տուժած՝ թեթև վնասվածքներով, ինքնուրույն է հասել հիվանդանոց, ասել է Բովեդան։ Ոստիկանությունը շարունակում է միջադեպի հետաքննությունը։
