Անկարան հուսով է խաղաղության հասնել Ստամբուլում Ռուսաստանի և Ուկրաինայի միջև բանակցություններից հետո, հաստատել է Թուրքիայի արտգործնախարար Հաքան Ֆիդանը։
«Խաղաղության համար շատ կարևոր քայլ կկատարվի, եթե կողմերի միջև տարաձայնությունները նվազեն: Անձամբ ես կարծում եմ, որ մենք բավական պատճառներ ունենք բանակցությունների հետ կապված հույսեր կապելու համար: Տա Աստված, որ բանակցությունների արդյունքում մենք խաղաղության հասնենք»,- ասել է Ֆիդանը Անթալիայում ՆԱՏՕ-ի ԱԳ նախարարների ոչ պաշտոնական հանդիպումից հետո կայացած մամուլի ասուլիսում:
Ռուսաստանի և Ուկրաինայի պատվիրակությունների միջև բանակցությունները Ստամբուլում կարող են սկսվել Մոսկվայի ժամանակով 16:30-ից հետո, ավելի վաղ ՌԻԱ Նովոստիին հայտնել է իրազեկ աղբյուրը։ Աղբյուրը նշել է, որ Ստամբուլում կա ռուսական պատվիրակություն և մի քանի ամերիկացի պաշտոնյաներ։ Նա չի հստակեցրել, թե այժմ որտեղ է գտնվում ուկրաինական պատվիրակությունը։
Վլադիմիր Զելենսկին ավելի վաղ ժամանել էր Թուրքիայի մայրաքաղաք Անկարա, որտեղ բանակցություններ կվարի Թուրքիայի նախագահ Ռեջեփ Թայիփ Էրդողանի հետ։ Զելենսկիին, ի թիվս այլոց, դիմավորել է Ուկրաինայի արտաքին գործերի նախարարության ղեկավար Անդրեյ Սիբիհան։
Թուրքիայի նախագահ Ռեջեփ Թայիփ Էրդողանը Վլադիմիր Զելենսկիի հետ հանդիպման ժամանակ կոչ կանի ժամանակ չկորցնել և հրադադարի համաձայնություն ձեռք բերել, ավելի վաղ հայտնել էր Թուրքիայի ղեկավարի վարչակազմը։
