Ֆրիդրիխ Մերցը, որը Գերմանիայի կանցլեր է ընտրվել մեկ շաբաթ առաջ, այդ պաշտոնում իր առաջին ելույթն է ունեցել Բունդեսթագում։ Նա խոստացել է ստեղծել Եվրոպայի ամենաուժեղ բանակը, իսկ դրա համար նախատեսել է ավելացնել բանակի ֆինանսավորումը, զինվորների թիվը մեծացնելու համար էլ «ստեղծել նոր գրավիչ կամավորական զինվորական ծառայություն», որը կարող է մոտիվացնել երիտասարդներին ստանձնելու երկրի անվտանգության պատասխանատվությունը, գրում է BBC-ն։
Մերցը նաև պատրաստակամություն է հայտնել անվերապահ աջակցություն ցուցաբերել Ուկրաինային, քանի որ համոզված է, ուկրաինական հակամարտության ելքը կորոշի ամբողջ Եվրոպայի ճակատագիրը: «Այս պատերազմը կորոշի՝ կհաղթանակեն օրենքն ու արդարադատությունը, թե՞ ռազմական ուժն ու բռնապետությունը»,- ընդգծել է Մերցը։
Նա նաև խոստացել է հնարավոր ամեն ինչ անել՝ ներդրումների և բարեփոխումների միջոցով Գերմանիայի տնտեսությունն աճի ուղի վերադարձնելու համար, ինչպես նաև խստացնել միգրացիոն օրենքները:
Հաջողության հասնելու համար Մերցը միասնության կոչ է արել: Ըստ կանցլերի` պահպանողական Քրիստոնեա-դեմոկրատական և Քրիստոնեա-սոցիալական միությունների դաշինքի ու կենտրոնամետ սոցիալ-դեմոկրատների կոալիցիան գործելու է «Պատասխանատվություն Գերմանիայի համար» կարգախոսի ներքո։
«Մենք միասին ծառայում ենք մեր երկրին ու նրա բոլոր 84 միլիոն քաղաքացիներին»,- ասել է Գերմանիայի կանցլերը։
