Չինաստանի և Լատինական Ամերիկայի երկրների իշխանությունները կհեշտացնեն միջազգային հրատապ խնդիրների, այդ թվում՝ ուկրաինական ճգնաժամի լուծումը։ Այս մասին հայտարարել է Չինաստանի Ժողովրդական Հանրապետության նախագահ Սի Ծինփինը։
«Չինաստանը և Լատինական Ամերիկայի երկրները կիրառում են իսկական բազմակողմանիություն, միասնաբար պաշտպանում են միջազգային արդարադատությունը, առաջ տանում են գլոբալ կառավարման համակարգի բարեփոխումները, խթանում են բազմաբևեռ աշխարհը և ժողովրդավարացնում են միջազգային հարաբերությունները»,- ընդգծել է նա՝ ելույթ ունենալով Չինաստան-Լատինական Ամերիկայի և Կարիբյան երկրների համայնքի (CELAC) 4-րդ նախարարական հանդիպման բացման արարողությանը։
«Չինաստանն ու Բրազիլիան համատեղ հայտարարեցին ուկրաինական ճգնաժամի քաղաքական կարգավորման շուրջ վեց կետից բաղկացած կոնսենսուսի մասին, որին դրական արձագանքեցին ավելի քան 110 երկրներ»:
Ինչպես նշել է Սի Ծինփինը, Չինաստանի իշխանությունները մտադիր են Լատինական Ամերիկայի երկրների հետ միասին «խոհեմությամբ և ուժով նպաստել միջազգային հրատապ խնդիրների լուծմանը»։ Չինաստանը և Լատինական Ամերիկան դարձել են «ճակատագրական համայնք», որի անդամները սերտորեն համագործակցում են միմյանց հետ, ասել է նա:
