Չինաստանը ողջունում է Ուկրաինայում խաղաղության հասնելուն ուղղված բոլոր ջանքերը, երկուշաբթի օրը կայացած ճեպազրույցում ասել է Չինաստանի ԱԳՆ խոսնակ Լին Ջիանը՝ մեկնաբանելով Ռուսաստանի առաջարկը՝ վերսկսել Ուկրաինայի հետ ուղիղ բանակցությունները Ստամբուլում։
«Մենք ողջունում ենք խաղաղության հասնելուն ուղղված բոլոր ջանքերը և հուսով ենք, որ բոլոր շահագրգիռ կողմերը կշարունակեն երկխոսությունն ու բանակցությունները՝ բոլոր կողմերի համար արդար, տեւական, պարտավորեցնող և ընդունելի խաղաղության համաձայնագրի կնքման նպատակով, որն ի վերջո կհանգեցնի ուկրաինական ճգնաժամի քաղաքական կարգավորմանը»,- ասել է Լին Ջիանը։
Կիրակի օրը Ռուսաստանի նախագահ Վլադիմիր Պուտինը դիմել է ռուսական և արտասահմանյան լրատվամիջոցներին և առաջարկել Ուկրաինային վերսկսել ուղիղ բանակցությունները՝ առանց նախապայմանների։
Ռուսաստանի ղեկավարն ընդգծել է, որ չի բացառում իրական զինադադարի ձեռքբերումը, որը կպահպանվի Կիևի ռեժիմի կողմից։
