Հնդկաստանն ու Պակիստանը կրկին բախվել են, այս անգամ՝ անօդաչու սարքերով ու հրետանային կրակով՝ պատճառելով առնվազն չորս տասնյակ զոհ, ինչն արդեն համարվում է վերջին 30 տարվա ամենալուրջ ռազմական հակամարտությունը։ Բախումները սկսվել են այն բանից հետո, երբ Հնդկաստանը հարվածել է Պակիստանի տարածքում գտնվող «ահաբեկչական ճամբարներին»՝ ի պատասխան Քաշմիրում հնդիկ զբոսաշրջիկների սպանությանը։ Պակիստանը հերքում է իր ներգրավվածությունը։
Տուժել են սահմանամերձ շրջանների բնակիչները․ նրանք զանգվածաբար լքում են իրենց տները, ԷյփիԷլ (IPL) պրեմիում քրիկետի առաջնությունը կասեցվել է, քաղաքներում հնչում են օդային տագնապի ազդանշաններ, իսկ մի շարք շրջաններում մթնոլորտը ծխով ու մրով է լցված։
Իսլամաբադը մեղադրում է Հնդկաստանին «սադրիչ գործողությունների» մեջ՝ նշելով, որ հինգ քաղաքացի է զոհվել պակիստանյան Քաշմիրում, այդ թվում՝ երեխա։ Միջազգային համայնքը, այդ թվում՝ ԱՄՆ-ը, Չինաստանը և Սաուդյան Արաբիան, կոչ են անում կողմերին դադարեցնել ռազմական գործողությունները, հայտնում է Reuters-ը։
