Գերմանիայի կանցլեր Ֆրիդրիխ Մերցն ակնկալում է, որ հանգստյան օրերից հետո ժամանակ կգա ուկրաինական հակամարտության կարգավորման շուրջ «լուրջ բանակցությունների»։ Այդ մասին նա հայտարարել է Եվրոպական խորհրդի նախագահ Անտոնիո Կոստայի հետ համատեղ մամուլի ասուլիսում։
Մերցի խոսքով՝ ԱՄՆ նախագահ Դոնալդ Թրամփի հետ երեկվա զրույցից հետո նա ակնկալում է, որ կուժեղացնի «ճնշումը Ռուսաստանի վրա», և որ «այս շաբաթավերջից հետո կլինի մի փուլ, որի ընթացքում կարող են լուրջ բանակցություններ տեղի ունենալ»։
Նախօրեին Վլադիմիր Զելենսկին հայտարարել էր, որ զրույց է ունեցել Թրամփի հետ, որի ընթացքում քննարկվել են «կոնկրետ քայլեր, որոնք կարելի է ձեռնարկել» խաղաղության հասնելու համար։ Զելենսկին կրկնել է Կիևի պայմանը, որ բանակցությունները կարող են սկսվել միայն հրադադարից հետո։
Ռուսաստանը բազմիցս հաստատել է Ուկրաինայի հետ առանց նախապայմանների ուղիղ բանակցությունների պատրաստակամությունը։ Ռուսաստանի նախագահ Վլադիմիր Պուտինը հրադադար է հայտարարել Հայրենական մեծ պատերազմում հաղթանակի 80-ամյակի կապակցությամբ, սակայն առաջին ժամերին ՌԴ պաշտպանության նախարարությունը հայտնել է Ուկրաինայի կողմից գրեթե 500 խախտումների մասին։
