Պաղեստինյան «Համաս» արմատական շարժումը կարծում է, որ անիմաստ է շարունակել բանակցությունները Իսրայելի հետ Գազայի հատվածում հրադադարի շուրջ, քանի դեռ հակամարտությունն ու անկլավի շրջափակումը շարունակվում են: Այս մասին հայտարարել է շարժման քաղբյուրոյի անդամ Բասեմ Նաիմը։
«Իմաստ չկա բանակցել կամ քննարկել հրադադարի մասին նոր առաջարկները, քանի դեռ սովի պատերազմը, ոչնչացման պատերազմը շարունակվում է Գազայի հատվածում», - ֆրանսիական AFP-ին ասել է ՀԱՄԱՍ-ի ներկայացուցիչը:
Նաիմը նաև կոչ է արել միջազգային հանրությանը «ճնշում գործադրել» Իսրայելի իշխանությունների վրա՝ «վերջ դնելու սպանություններին ու հանցագործություններին, որոնք հանգեցնում են սովի և ծարավի»։
Ավելի վաղ Պաղեստինի Կարմիր մահիկի ընկերությունը հայտնել էր, որ Գազայի հատվածում մարդասիրական օգնության բաշխման կենտրոններում և շուկաներում սննդամթերքի պաշարները սպառվել են:
