Հորդանանի վարդագույն ավազաքարային ժայռերի մեջ փորագրված Պետրա հինավուրց քաղաքի սրտում Խազնա կամ «Փարավոնի գանձարան» անուններով հայտնի եզակի հուշարձան կա։ Իսկ նույն շինության տակ հնագետները վերջերս առնվազն 2000 տարվա վաղեմության 12 մարդկային կմախքներ և արտեֆակտներ պարունակող գերեզման են հայտնաբերել, հաղորդում է CNN-ը: Ամերիկյան հետազոտական կենտրոնի գործադիր տնօրեն դոկտոր Փիրս Փոլ Քրիզմանի գլխավորությամբ հնագետները պեղել են հնագույն դամբարանը: Արշավախումբը հետազոտում էր գանձարանը տարիներ շարունակ արված ենթադրություններից հետո, որ 2003 թվականին հուշարձանի ձախ կողմում հայտնաբերված երկու դամբարանները միակ ստորգետնյա դամբարանները չեն:
Քրիզմանը և գիտնականների նրա թիմը կիրառել են ռադիոտեղորոշիչ՝ հեռահար զոնդավորման տեխնիկա, որն օգտագործում է ռադիոտեղորոշիչ իմպուլսներ՝ ստորգետնյա օբյեկտներ հայտնաբերելու համար, որպեսզի տեսնեն, թե ձախ կողմում, որտեղ հայտնաբերվել են առաջին դամբարանները, համընկնո՞ւմ են արդյոք աջ կողմում հայնաբարվածի բնութագրերի հետ: Գտածոները երկու կողմերի միջև ուժեղ նմանություններ բացահայտեցին, և դա ապացույցն էր, որի կարիքը նրանք ունեին՝ Հորդանանի կառավարությունից՝ Գանձարանի տակ պեղումներ կատարելու թույլտվություն ստանալու համար:
Օգոստոսին հնագետների խումբը սկսել պեղումներ անել նորահայտ դամբարանում։ Բայց իսկական անակնկալը գերեզմանի ներսում հայտնաբերվածն էր։ Թեև Պետրայում հայտնաբերված շատ գերեզմաններ դատարկ են եղել, այս գերեզմանատունը լցված էր կմախքի մնացորդներով և բրոնզից, երկաթից և խեցեղենից պատրաստված թաղման իրերով:
Ըստ Քրիզմանի՝ գանձարանի տակ հայտնաբերված անձեռնմխելի մնացած գերեզմանը հազվագյուտ պատկերացում է տալիս նաբաթացիների ՝ հին արաբ քոչվորների կյանքին, որոնց անապատային Նաբաթեական թագավորությունը (կամ Նաբաթեան) ծաղկել է մ.թ.ա. չորրորդ դարից մինչև մ.թ. 106 թվականը:
Գիտնականների կարծիքով այս կարևոր գտածոն ամենայն հավանականությամբ Պետրայում մեկ վայրում հայտնաբերված մարդկային մնացորդների ամենամեծ հավաքածուն է:
2000-ականներին իր յուրահատուկ ճարտարապետությամբ և առ այսօր քաղաքը շրջապատող բազմաթիվ առեղծվածներով Պետրան ճանաչվել է աշխարհի նոր յոթ հրաշալիքներից մեկը:
Տարեկան հարյուր հազարավոր զբոսաշրջիկների ընդունող Գանձաարանը նկարահանվել է մի քանի ֆիլմերում, որոնցից ամենահայտնին 1989 թվականին նկարահանված «Ինդիանա Ջոնսը և վերջին խաչակրաց արշավանքը» ֆիլմն է:
