Իրանը շարունակում է բանակցությունների միջոցով լուծել իր միջուկային ծրագրի շուրջ տարաձայնությունները:
Այս մասին հայտարարել է Իսլամական Հանրապետության արտաքին գործերի նախարար Աբբաս Արաղչին՝ մեկնաբանելով ԱՄՆ-ի և Իրանի միջև բանակցությունների հաջորդ փուլը հետաձգելու որոշումը։
«Օմանցի և ամերիկացի մեր գործընկերների հետ մենք որոշել ենք հետաձգել բանակցությունների չորրորդ փուլը՝ լոգիստիկ և տեխնիկական պատճառներով։ Իրանական կողմից որևէ փոփոխություն չկա բանակցային կարգավորման հասնելու մեր վճռականության մեջ»,- գրել է նախարարը X-ում։
Արաղչին հավելել է, որ Իսլամական Հանրապետությունը, «ավելի քան երբևէ, վճռական է արդար և հավասարակշռված համաձայնության հասնելու հարցում, որը կապահովի պատժամիջոցների ավարտը և վստահություն կստեղծի, որ Իրանի միջուկային ծրագիրը հավերժ կմնա խաղաղ՝ Իրանի իրավունքները լիովին հարգելով»:
ԱՄՆ-ը և Իրանը Օմանի միջնորդությամբ բանակցությունների երեք փուլ են անցկացրել՝ լուծելու Իսլամական Հանրապետության միջուկային ծրագրի շուրջ ստեղծված ճգնաժամը։
