Իրաքի հարավային ճահիճներում գոմեշների քանակը վերջին տասնամյակում կտրուկ նվազել է․ մասնագետները ահազանգում են, որ հիմնական պատճառը երկարատև երաշտներն են, որոնք սպառնում են ինչպես կենդանիներին, այնպես էլ գյուղատնտեսությամբ զբաղվող ընտանիքներին։ «Ունեի մոտ 130 գոմեշ, հիմա մնացել է ընդամենը 50 կամ 60։ Ոմանք սատկեցին, մյուսներին վաճառեցինք, որովհետև ջուր չկար», — պատմում է 38-ամյա գյուղացի Սաբահ Իսմայիլը Դի Քար նահանգից։
Ըստ ճահիճների ուսումնասիրությամբ զբաղվող Ջասիմ ալ-Ասադիի՝ 2015-ից ի վեր Իրաքում գոմեշների թիվը նվազել է մոտ 150,000-ից՝ հասնելով 65,000-ի։ Դրա պատճառներից են՝ հողի չորացումը, կերերի գների աճը, ջրի աղտոտվածությունը, ինչպես նաև բարդ տնտեսական պայմանները, որոնք ստիպում են գյուղացիներին լքել իրենց բնակավայրերը, հայտնում է Reuters-ը։
Իրավիճակն ավելի է սրվում Տիգրիս և Եփրատ գետերի վերին հոսանքում Թուրքիայում և Իրանում կառուցված ամբարտակների հետևանքով։ Կլիմայական փոփոխությունները, անարդյունավետ ոռոգման համակարգերն ու պլանավորման բացակայությունը հանգեցնում են քայքայվող գյուղական կենսակերպի։ «Աստված գիտի՝ այս ամառ գոմեշների մահացության ցուցանիշը կարող է հասնել 50 տոկոսի», — զգուշացնում է ևս մեկ տեղացի անասնապահ։
