Բրազիլիայի նախկին նախագահ Ժաիր Բոլսոնարուն գտնվում է Բրազիլիայում՝ DF Star հիվանդանոցի վերակենդանացման բաժանմունքում։ Նրա բժիշկները հայտնել են, որ վիրահատությունից հետո արձանագրվել է «կլինիկական վիճակի վատթարացում»։ Ըստ պաշտոնական հայտարարության՝ Բոլսոնարուն ունի բարձր ճնշում և լյարդի անալիզների վատթարացող ցուցանիշներ։ Վիրահատությունն իրականացվել է աղեստամոքսային համակարգի հետ կապված շարունակվող բարդությունների պատճառով, որոնք սկսվել են 2018 թվականի մահափորձից հետո ։
Նախկին նախագահը նախկինում մի քանի անգամ հոսպիտալացվել է՝ կապված աղիքային խցանումների և որովայնի ցավերի հետ։ Վերջին հոսպիտալացումը տեղի է ունեցել այն բանից հետո, երբ Բոլսոնարուն կտրուկ ցավեր է ունեցել հյուսիսարևելյան Բրազիլիայում հանդիպման ժամանակ, հայտնում է CNN Word-ը։
Բրազիլիայի Գերագույն դատարանը մարտին որոշում էր կայացրել Բոլսոնարուի նկատմամբ հարուցել դատական գործ՝ 2022-ի ընտրությունների արդյունքները կասկածի տակ դնելու փորձի շրջանակում։ Նախկին նախագահը հերքում է բոլոր մեղադրանքները։ Նրա բժիշկները նշում են, որ Բոլսոնարուն շարունակելու է շարժողական ֆիզիոթերապիա և թրոմբոզի կանխարգելման բուժում։
