Եմենի հութիները` «Անսար Ալլահ» ապստամբ շարժումից, «հիպերձայնային բալիստիկ հրթիռ» են արձակել Նևաթիմում իսրայելական ավիաբազայի վրա։ Այս մասին հայտնել է ապստամբների ռազմական խոսնակ Յահյա Սարիան։
«Եմենի զինված ուժերի հրթիռային ուժերը ռազմական գործողություն են իրականացրել՝ գրոհելով Պաղեստին-2 գերձայնային բալիստիկ հրթիռով Նեգևի շրջանում գտնվող Նևաթիմ ավիաբազայի վրա», - ասել է նա հութիներին պատկանող «Ալ Մասիրա» հեռուստաալիքի եթերում։
Սարիայի խոսքով՝ իսրայելական հակաօդային պաշտպանության համակարգերը չեն կարողացել որսալ հրթիռը, որը «հաջողությամբ հասել է իր թիրախին»։
Ավելի վաղ իսրայելական բանակը հայտնել էր Եմենից արձակված հրթիռի որսալու մասին։ Բանակի մամուլի ծառայության հաղորդագրության մեջ ասվում է, որ զինամթերքը ոչնչացվել է նախքան Իսրայելի օդային տարածք մտնելը։
Երկրի տարբեր հատվածներում օդային հարվածների ազդանշաններ են հնչել:
