ԱՄՆ կոնգրեսականները Սիրիա են այցելել ոչ պաշտոնական այցով, հայտնում է Associated Press-ը։
Ավելի վաղ Washington Post-ը հայտնել էր, որ ԱՄՆ նախագահ Դոնալդ Թրամփի վարչակազմի պաշտոնյան անցյալ ամիս ութ պահանջներից բաղկացած ցուցակ է փոխանցել Սիրիայի արտգործնախարար Ասադ ալ-Շեյբանիին՝ պատժամիջոցների չեղարկման դիմաց, որոնցից մեկն ԱՄՆ-ին Սիրիայում հակաահաբեկչական գործողություններ իրականացնելու իրավունք է տալիս։
«Կոնգրեսի անդամները ոչ պաշտոնական այց են կատարել Սիրիա, քանի որ ԱՄՆ-ը քննարկում է պատժամիջոցների թուլացումը։
Ինդիանա նահանգից պատգամավոր Մարլին Ստուտցմանը և Ֆլորիդայի ներկայացուցիչ Քորի Միլսն այցելել են Ջոբար՝ Դամասկոսի արվարձան, որտեղ գտնվում է պատմական սինագոգը և Բաբ Թումա քրիստոնեական թաղամասը։ Նրանք նաև հանդիպում են ունեցել Սիրիայի ժամանակավոր նախագահ Ահմադ ալ-Շարաայի և այլ պետական պաշտոնյաների հետ»,- ասվում է գործակալության հաղորդագրության մեջ։
Նշվում է, որ նրանք դարձել են առաջին ամերիկացի օրենսդիրները, ովքեր այցելել են երկիր նոր կառավարության օրոք։
Ավելի վաղ ԱՄՆ Պետդեպարտամենտի խոսնակ Թեմմի Բրյուսը հայտարարել էր, որ ԱՄՆ-ը դեռ չի ծրագրում փոխել Սիրիայի դեմ պատժամիջոցների ռեժիմը, սակայն գնահատում է այնտեղ իրավիճակը՝ Դամասկոսի նկատմամբ ապագա քաղաքականությունը որոշելու համար։
