ԱՄՆ նախագահ Դոնալդ Թրամփի վարչակազմը զգալիորեն կրճատել է Պետդեպարտամենտի կողմից հրապարակվող՝ աշխարհում մարդու իրավունքների պահպանման վերաբերյալ տարեկան զեկույցների ծավալը, այս մասին տեղեկացնում է NPR-ը՝ հղում անելով կառույցի ներսում շրջանառվող խմբագրական գրությանը։
Նոր մոտեցման նպատակն է, ըստ փաստաթղթի, զեկույցները համապատասխանեցնել ԱՄՆ ընթացիկ քաղաքականությանը և Թրամփի կողմից ստորագրված վերջին նախագահական հրամանագրերին։
Հեռացվող բովանդակության շրջանակում են բանտային ծանր պայմանների վերաբերյալ քննադատությունները, կառավարական կոռուպցիայի և քաղաքական գործընթացին մասնակցության սահմանափակումների մասին տվյալները, ազատ տեղաշարժի, խաղաղ հավաքների և դատավարական երաշխիքների խախտումների մասին արձանագրումները, բռնի կամ հարկադիր բժշկական պրակտիկաների, անձնական կյանքի ազատության խախտման և համացանցի սահմանափակումների մասին տեղեկությունները, գենդերային բռնության, հաշմանդամություն ունեցող անձանց նկատմամբ սպառնալիքների մասին նշումները և այլն։
