Դաղստանում նորածին երեխայի վաճառքի հետ կապված գործարք է բացահայտվել. մայրը ծննդատնից դուրս գրվելուց անմիջապես հետո ստացել է 500 հազար ռուբլի։ Այս մասին հայտնում է Mash Gor Telegram ալիքը։
Telegram ալիքի տվյալներով՝ 2024 թվականի դեկտեմբերին Դաղստանի 24-ամյա բնակչուհին ծննդաբերելուց անմիջապես հետո երեխային հանձնել է 40-ամյա կնոջ։ Մայրը 500 հազար ռուբլի է ստացել նորածինին վաճառելու համար։
Որոշ ժամանակ անց երեխայի համար փորձել են փաստաթղթեր կազմել, սակայն մասնագետները կեղծիքի կասկածանքով դիմել են ոստիկանություն։ Երկու կանայք էլ լիովին ընդունել են իրենց մեղքը։ Գնորդն իր գործողությունները բացատրել է սեփական երեխաներ ունենալու անհնարինությամբ, իսկ վաճառողն անդրադարձել է ֆինանսական ծանր վիճակին։
Չորս ամսական փոքրիկը ժամանակավորապես հանձնվել է պետական խնամքի։ Դեպքի հանգամանքները պարզվում են։
