Ուզբեկստանի արտգործնախարար Բախտիյոր Սաիդովը և ԱՄՆ պետքարտուղար Մարկո Ռուբիոն հանդիպում են ունեցել Վաշինգտոնում, որի ընթացքում քննարկել են Կենտրոնական Ասիայի տարածաշրջանում անվտանգության և կայունության հարցերը։
«Մենք ուրախ ենք հանդիպել ԱՄՆ պետքարտուղար Մարկո Ռուբիոյի հետ՝ Ուզբեկստանի և Միացյալ Նահանգների միջև ռազմավարական գործընկերության ներկա դինամիկայի և ապագա ուղղությունների վերաբերյալ մտքերի համապարփակ փոխանակման համար։
Մենք քննարկել ենք առանցքային թեմաների լայն շրջանակ՝ ներառյալ քաղաքական երկխոսության ամրապնդումը, տնտեսական և ներդրումային համագործակցության ընդլայնումը, տարածաշրջանային կապերի զարգացումը և Կենտրոնական Ասիայում անվտանգության ու կայունության ապահովումը»,- գրել է Սաիդովը Telegram-ի իր ալիքում։
«Մենք բարձր ենք գնահատում Միացյալ Նահանգների հզոր աջակցությունը Ուզբեկստանում ընթացող բարեփոխումներին: Մենք պայմանավորվեցինք պահպանել երկկողմ հարաբերությունների դրական դինամիկան՝ շարունակելով բարձր մակարդակի երկխոսությունը և գործնական համագործակցությունը ռազմավարական գործընկերության շրջանակներում», - հավելել է Ուզբեկստանի դիվանագիտության ղեկավարը։
