Ռուսաստանն անում է ամեն ինչ, որպեսզի Իրանի միջուկային ծրագրի շուրջ ստեղծված իրավիճակը լուծվի խիստ քաղաքական և դիվանագիտական մեթոդներով։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Մոսկվայում Ռուսաստանի Դաշնության, Չինաստանի և Իրանի ներկայացուցիչների խորհրդակցությունները։
«Մեր երկիրն, ինձ թվում է, ամեն ինչ անում է կարգավորումը հնարավոր դարձնելու, դրան հասնելու խիստ քաղաքական և դիվանագիտական մեթոդներով: Կան բազմաթիվ ապացույցներ», - ասել է դիվանագետը: Որպես օրինակ՝ Զախարովան բերել է մարտի 14-ին Պեկինում և ապրիլի 8-ին Մոսկվայում տեղի ունեցած եռակողմ հանդիպումները, ինչպես նաև ապրիլի 2-ին Ռուսաստանի Դաշնության և Իրանի փոխարտգործնախարարների հանդիպումը։
ՌԴ ԱԳՆ պաշտոնական ներկայացուցիչը նշել է, որ Ռուսաստանի դիրքորոշումն այս հարցում մնում է «հետևողական» և հիմնված է այն փաստի վրա, որ «իրանական միջուկային ծրագրի վերաբերյալ Արևմուտքում առկա կասկածներն ու նախազգուշացումները պետք է վերացվեն միջազգային իրավունքի հիման վրա ղեկավարվելով հավասար և անբաժանելի անվտանգության սկզբունքով՝ ապահովելով պատշաճ փոխադարձ նկատառում և շահերի մանրակրկիտ կշռադատված հավասարակշռություն»:
