Միացյալ Նահանգները պետք է ապացուցի, որ իսկապես մտադիր է բանակցել Իրանի հետ միջուկային ծրագրի շուրջ, երկուշաբթի օրը հայտարարել է Իսլամական Հանրապետության նախագահ Մասուդ Փեզեշքիանը։
Ավելի վաղ ԱՄՆ նախագահ Դոնալդ Թրամփը NBC News-ին տված հարցազրույցում սպառնացել էր «աննախադեպ ռմբակոծություններով», եթե ԱՄՆ-ը ու Իրանը համաձայնության չգան։
«Մենք հավատում ենք բանակցություններին։ Մենք բանակցում ենք ամբողջ աշխարհի հետ և ոչ մեկի հետ չենք վիճում, բայց չենք հանդուրժի նվաստացումը և չենք բանակցելու ամեն գնով, մենք չենք պատրաստվում պատերազմ սկսել, ապակայունացնել իրավիճակը կամ միջուկային ռումբեր ստեղծել։
Մենք հավատարիմ ենք բանակցություններին, բայց Միացյալ Նահանգները նույնպես պետք է ապացուցի, որ իրենք նույնպես պատրաստվում են վարել դրանք»,- իրանական SNN պետական գործակալության հաղորդմամբ՝ ասել է նա։
Դեռևս փետրվարին ԱՄՆ նախագահ Դոնալդ Թրամփը հայտարարել էր, որ պատրաստ է գործարք կնքել Իրանի հետ՝ նրա դեմ ռազմական գործողություններ սկսելու փոխարեն։
