ԱՄՆ նախագահ Դոնալդ Թրամփի նոր մաքսատուրքերը լուրջ ազդեցություն կունենան համաշխարհային տնտեսության վերականգնման վրա և չեն ստիպի Չինաստանին առևտրային բանակցություններ վարել ԱՄՆ-ի հետ։ Այս մասին հայտարարել է Չինաստանի ԱԳՆ պաշտոնական ներկայացուցիչ Լին Ցզյանը։
«ԱՄՆ-ի կողմից մաքսատուրքերի անխտիր սահմանումը հավասարազոր է բոլոր պետություններին զարգացման իրավունքից զրկելուն, հատկապես համաշխարհային հարավում:
Սա լուրջ հարված կհասցնի համաշխարհային տնտեսության վերականգնման գործընթացին և անխուսափելիորեն կհանդիպի միջազգային հանրության համընդհանուր հակազդեցության»,- ընդգծել է նա ճեպազրույցում։
Ինչպես պարզաբանել է ԱԳՆ պաշտոնական ներկայացուցիչը, Առևտրի համաշխարհային կազմակերպության (ԱՀԿ) տվյալների վերլուծությունը ցույց է տալիս, որ Թրամփի պրոտեկցիոնիզմը կխորացնի տարբեր երկրներում հարուստների և աղքատների միջև անջրպետը, և ամենամեծ հարվածը կհասցվի ամենաքիչ հարուստ մարդկանց։ Բացի այդ, նման քաղաքականությունը բացասաբար կանդրադառնա ՄԱԿ-ի կայուն զարգացման նպատակներին մինչև 2030թ.։
