Գյումրու ՏԻՄ ընտրություններից հետո «Քաղաքացիական պայմանագիր» կուսակցությանն իշխանազրկելու ռեալ շանս կա։ Sputnik Արմենիա մուլտիմեդիոն կենտրոնում այս հայտարարությունն արեց քաղտեխնոլոգ Վիգեն Հակոբյանը։
Մարտի 30-ին Գյումրի և Փարաքար խոշորացված համայնքներում անցկացված ընտրություններից հետո հայտնի դարձավ, որ Գյումրիում ամենաշատ քվեներ է ստացել «Քաղաքացիական պայմանագիր» կուսակցությունը՝ 17.183 (36%), որի համայնքապետի թեկնածուն Սարիկ Մինասյանն է։ Երկրորդ տեղում ընդդիմադիր ՀԿԿ-ն է (Վարդան Ղուկասյան, 9727 քվե կամ 20,48%)։ Անցողիկ շեմը հաղթահարել են նաև «Մայր Հայաստան», «Մեր քաղաքը» դաշինքները և «Իմ հզոր համայնք» կուսակցությունը։ «Մայր Հայաստանը» և «Իմ հզոր» համայնքը» հայտարարել են Հայաստանի կոմունիստական կուսակցությանը միանալու մասին։
Հակոբյանը նշեց, որ Գյումրու ՏԻՄ ընտրություններից հետո մի ինտրիգ կա` ինչ կասի «Մեր քաղաքը» դաշինքի թեկնածու Մարտուն Գրիգորյանը։
Նա վստահ է` եթե Գրիգորյանն օգնի Վարդան Ղուկասյանին քաղաքապետ ընտրվել, ապա իշխանափոխությունը կդառնա փաստ։
«Եթե Մարտուն Գրիգորյանն աջակցի ընդդիմության մյուս ներկայացուցիչներին, ապա դա կլինի ոչ թե կոալիցիա, այլ ընդդեմ համագործակցություն` ՔՊ-ի իշխանազրկման համար։ Եթե Գրիգորյանի և մյուսների համագործակցությունը չլինի, ապա այս ճանապարհը կարող է տանել քաղաքական փակուղու, որը կբերի նոր ընտրությունների։ ՔՊ-ին իշխանազրկելու ռեալ շանս կա»,- ասաց քաղտեխնոլոգը։
Նա շեշտեց, որ ՔՊ-ն արդեն մի քանի տարի է` չի կարողանում ընտրությունների միջոցով վերարտադրվել։ Նման իրավիճակ է ոչ միայն Գյումրիում, այլ նաև Փարաքարում, տարիներ առաջ էլ նման դեպքեր եղել են Նոյեմբերյանում, Վանաձորում, իսկ Երևանում բացարձակ մեծամասնություն չեն կարողացել դառնալ։
Հակոբյանի խոսքով` արդեն հիմա իշխանությունները փորձում են քրեաիրավական մեթոդներով չեզոքացնել ընդդիմադիր թեկնածուին։ Խոսքը մասնավորապես քրեական վարույթի մասին է, որը հարուցվել է Ղուկասյանի ու նրա կողմնակիցների հետ զրույցի արտահոսքից հետո, որտեղ նա պահանջում է հավաքել ինչ-որ մարդկանց` սպառնալով, որ նրանց համար «խնդիրներ» կստեղծվեն։
