«Պառլամենտարիզմի զարգացման միջազգային կենտրոն» ՀԿ-ն Գյումրու ավագանու արտահերթ ընտրությունների վերաբերյալ ծավալուն զեկույց է ներկայացնելու ԿԸՀ-ին։
Ինչպես լրագրողների հետ հանդիպմանը հայտարարեց կենտրոնի ղեկավար Գոհար Մելոյանը, զեկույցը բաղկացած է լինելու երկու մասից՝ մի մասում կընդգրկվեն նախընտրական քարոզչության ընթացքում արձանագրած խախտումները, մյուսում՝ քվեարկության օրը գրանցվածները։
Մելոյանը նախ նշեց, կենտրոնի դիտորդներին մի քանի պաշտոնյաներ սպառնացել են դատի տալ զրպարտության համար, կենտրոնի ղեկավարը սպասում է հայցերին։
«Անհիմն, սուտ, մանիպուլյատիվ մեղադրանքներ են հնչել մեր հասցեին, ես ակնկալում եմ հրապարակային ներողություն մեր անաչառ գործունեության վերաբերյալ զրպարտություն ու վիրավորանք տարածելու համար»,-նշեց ՀԿ ղեկավարը։
Անդրադառնալով քվեարկության օրը գրանցած խախտումներին՝ ՀԿ նախագահն ասաց, խախտումները սկսել են գրանցվել դեռ լուսաբացից, երբ գործարկվեցին ուղիղ եթեր ապահովող տեսախցիկները։
«Մի շարք տեղամասային կենտրոններում տեսախցիկներն այնպես էին դրված, որ քվեարկության ընթացքը չէր երևում։ Մեծամասամբ տեխնիկական սարքերը, որի միջոցով գրանցվում էին քաղաքացիները, ընդգրկված չէին կադրում»,-նշեց Մելոյանը։
Հաջորդ խնդիրն այն էր, որ տեղամասերից շատերը տեղակայավել էին խիստ փոքր սենյակներում, ինչի պայմաններում դժվար էր քվեարկության անցկացումը։
«Բովանդակային խախտումերը բավականին հաճախ կրկնվում էին։ Քաղաքացին, երբ մոտենում է, հանձնաժողով անդամը պետք է հավաքի բոլոր քվեաթերթիկները հատ առ հատ, փոխանցի նրան։ Սակայն կային դեպքեր, երբ հանձնաժողովի անդամը նախապես տրցակը կազմում էր, տալիս քաղաքացուն։ Իմ ներկայությամբ էլ արձանագրվեց դեպք, երբ քվեախուց մտած քաղաքացին հայտարարեց, որ իր նախընտրած ուժի քվեաթերթիկը չի գտնում։ Այս պարագայում հանձնաժողովը խառնվեց, շփոթվեց, առաջարկեցի այդ քվեաթերթիկները մարել, նոր տրցակ տրամադրել»,-ասաց կենտրոնի ղեկավարը։
Նա նկատել է, որ հաճախ թիվ 6 քվեաթերթիկը հակառակ ուղղությամբ են դրել, ինչը հավանական է, որ շփոթմունք կառաջացնի թիվ 9 քվեաթերթիկի հետ։
«Հնարավոր է, որ դիտավորություն չի, բայց մի քանի անգամ նման արձանագրում եղել է։ Եղել են դեպքեր, երբ քաղաքացին ծրարը նետել է քվեատուփ, առանց դրոշմանիշը փակցնելու։ Այդ պարագայում քվեաթերթիկն անվավեր է ճանաչվում»,-ասաց Մելոյանը․
Լայնածավալ խախտումներ են արձանագրվել ընտրատեղամասերի դիմաց կուտակումների, ուղղորդումների վերաբերյալ։
«Բացահայտել ենք ՔՊ վստահված անձանց սխեմատիկ գործունեություն ցուցակերի տեսքով։ Կրկին ընդգծում եմ, անգամ որոշ դիտորդական առաքելություններ կարծես մեր նկատմամբ էլ էին դիտորդություն իրականացնում, նշում էին, որ մարդիկ մասնակցությունն են հաշվում, բայց մենք ունենք տասնյակ օրինակներ արձանագրված, որոնք վկայում են, դրանք զուտ տեխնիկական հաշվարկ չէին, այլ բնույթի նշումներ էին պարունակում։ Մեր պնդումն այն է, որ դա զուտ հաշվարկ չէր, իրականացվում էր վերահսկողություն»,-ասաց Գոհար Մելոյանը՝ նշելով, որ օրն ամփոփվել է որոշ տեղամասերում հոսանքազրկումներով։
ՀԿ ղեկավարն ասաց՝ դիտորդների հետ արդյունավետ համագործակցել են նաև ԶԼՄ-ները, ինչի շնորհիվ կանխվել են մի շարք խախտումներ։
Պառլամենտարիզմի զարգացման միջազգային կենտրոնը ձեւավորվել է 2019 թվականին՝ իր գործունեության առաջնային նպատակ հռչակելով ժողովրդավարության հաստատումը, իրավունքի գերակայության ամրագրումը, պառլամենտարիզմի զարգացումը, մարդկանց իրազեկվածության ու իրավագիտակցության բարձրացումը, մարդու անձնական, քաղաքական, սոցիատնտեսական իրավունքների իրականացման երաշխավորումը Հայաստանի Հանրապետությունում։ Իր գործունեության 6 տարիների ընթացքում կազմակերպություն իրականացրել է իրազեկող գործունեություն, կազմակերպել է դասընթացներ մարզերում։ ՊԶՄԿ-ն նաեւ իրականացնում է դիտորդական առաքելություն ընտրական գործընթացներում, որի համատեքստում կազմակերպում է դասընթացներ եւ վերապատրաստում դիտորդների։
