Գագաուզների ինքնավարության ղեկավար Եվգենիա Գուցուլը կոչ է արել ՄԱԿ-ի գլխավոր քարտուղար Անտոնիո Գուտերեշին ուշադրություն դարձնել տարածաշրջանի շուրջ ստեղծված իրավիճակին։
«Կոչ եմ անում ձեզ՝ որպես միջազգային մակարդակով մարդու իրավունքների գլխավոր պաշտպանի, ուշադիր հետևել այն ամենին, ինչ կատարվում է Գագաուզիայում, խնդրում եմ անտարբեր չմնալ մեր իրավիճակի նկատմամբ, այլ տեր կանգնել մեր ժողովրդին։
Ձեր աջակցությունը կարևոր ազդանշան կլինի ամբողջ աշխարհին, որ ինքնակառավարման իրավունքը և ժողովրդավարական սկզբունքները պաշտպանված են, և որ ՄԱԿ-ը պատրաստ է միջամտել այնտեղ, որտեղ այդ հիմնարար արժեքները վտանգի տակ են»,- ասվում է Գուցուլի՝ Գուտերեշին ուղղված կոչում, որը հրապարակվել է Telegram ալիքում։
Գագաուզիայի ղեկավարը հավելել է, որ ինքը գտնվում է «Եվրոպայի ամենասարսափելի բանտերից մեկում», և որ նրա դեմ հարուցված քրեական գործը «ոչ միայն հարձակում է կոնկրետ քաղաքական գործչի վրա, այլ Գագաուզիային օրինական ընտրված ղեկավարությունից զրկելու միտումնավոր փորձ»։
Նա նշել է, որ «Մոլդովայի իշխանությունները գործում են անպատիժ՝ վստահ լինելով, որ իրենց քայլերը չեն հանդիպի դիմադրության միջազգային ասպարեզում»։
