Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ՌԴ նախագահ Վլադիմիր Պուտինի հետ։ Քննարկվել են երկկողմ հարաբերությունները, տարածաշրջանային և գլոբալ հարցեր, այդ թվում՝ Ուկրաինայում կարգավորման հարցը, բանակցությունների արդյունքներից հետո հայտնել է Թուրքիայի ղեկավարի վարչակազմը։
«Զրույցի ընթացքում քննարկվել են Թուրքիայի և Ռուսաստանի երկկողմ հարաբերությունները, տարածաշրջանային և գլոբալ հարցեր։ Նախագահ Էրդողանը նշել է, որ Թուրքիայի և Ռուսաստանի համագործակցությունը առանցքային է տարածաշրջանային խնդիրների լուծման համար, որ Թուրքիան ուշադիր հետևում է գործընթացին, Թուրքիան պատրաստ է ցանկացած աջակցություն ցուցաբերել՝ ներառյալ խաղաղ բանակցությունների կազմակերպումը, որպեսզի ապահովվի պատվաբեր և տեւական խաղաղություն»,- ասվում է հայտարարության մեջ։
«Նախագահ Էրդողանը հայտարարել է, որ մտածված քայլերը, որոնք կձեռնարկվեն Սև ծովում առևտրային նավագնացության անվտանգությունն ապահովելու համար, կնպաստեն խաղաղ գործընթացին, և որ Թուրքիան շարունակում է անել իր մասը՝ թույլ չտալու, որ Սև ծովը դառնա հակամարտության գոտի», - նշվում է տեքստում։
Էրդողանը հեռախոսազրույցի ընթացքում նաեւ ասել է, որ Անկարան մեծ նշանակություն է տալիս Սիրիայի հարցում Ռուսաստանի հետ համագործակցությանը։
