Հայաստանի Հանրապետության նախագահ Վահագն Խաչատուրյանը հնարավորություն է տեսնում, որ մինչև տարվա վերջ Հայաստանն ու Ադրբեջանը խաղաղության համաձայնագիր կստորագրեն, հայտնում է «Արմենպրես»-ը։
Հայաստանի նախագահն այս մասին ասել է «Արմենպրես»-ին և «Շանթ հեռուստաընկերությանը տված հարցազրույցում՝ անդրադառնալով Հայաստանի և Ադրբեջանի միջև խաղաղության պայմանագիր ստորագրելու հավանականությանն այն իրավիճակում, երբ Ադրբեջանի կողմից Հայաստանի հասցեին պարբերաբար սպառնալիքներ են հնչում, իսկ խաղաղության պայմանագիր ստորագրելու համար Ադրբեջանն անընդհատ նոր պահանջներ է առաջ քաշում։ Նախագահի խոսքով՝ շատ ցանկալի է, որ Հայաստանը և Ադրբեջանը խաղաղության պայմանագիրը ստորագրեն Բաքվում կայանալիք COP29 գագաթնաժողովից առաջ, բայց դա կարող է չստացվել։ «Բայց ավելի մոտ ժամանակներում, միգուցե, COP29-ից հետո՝ մինչև տարվա վերջ, մենք հնարավորություն կունենանք խաղաղության համաձայնագիրը ստորագրել, քանի որ դրա հիմնական բովանդակությունը երկու կողմերի համար էլ ընկալելի է», - ասաց ՀՀ նախագահը:
Նրա խոսքով՝ ինչպես կյանքում, այդպես էլ քաղաքականության մեջ ամեն ինչ հեշտ չի ստացվում կամ տրվում: «Պետք է մեր գաղափարները համբերատար առաջ տանել, թեկուզ բոլոր այն հայտարարությունների ֆոնին, որոնք շատ անհանգստացնում են ինչպես մեր հասարակությանն, այնպես էլ մեզ: Մենք փորձում ենք այդ ամեն ինչին պատասխանել այնպիսի քայլերով, որոնք իրականում ոչ թե իրավիճակը կսրեն, լարվածությունը կմեծացնեն, այլ միտված կլինեն հենց խաղաղության հաստատմանը», - նշեց ՀՀ նախագահը:
Վահագն Խաչատուրյանը ևս մեկ անգամ վերահաստատեց, որ այն հայտարարությունները, որոնք արել են Հայաստանի Հանրապետության վարչապետը և պետական իշխանության տարբեր ներկայացուցիչներ խաղաղության պայմանագիրը հենց այս պահին ստորագրելու պատրաստակամության վերաբերյալ, ուժի մեջ են: «Բայց ադրբեջանական կողմից էլ, իհարկե, որոշակի խնդիրներ են մեջտեղ բերվում, որոնց հետևանքով այդ ամեն ինչը հետաձգվում է։ Բայց այն, ինչ կատարվել է վերջին տարիների ընթացքում, այն, ինչին մենք հիմա հասել ենք և, կարծես թե, վերջին փուլում ենք գտնվում, հեշտ չեն տրվել»,- ասաց Խաչատուրյանը:
Նախագահի դիտարկմամբ՝ խաղաղության հաստատման ուղղությամբ իրականացված քայլերը երկարաժամկետ և մանրակրկիտ աշխատանքի արդյունքում են եղել, ու հիմա էլ այդ աշխատանքները կատարվում են: «Խաղաղությանն այլընտրանք չկա. պատերազմելու ցանկություն Հայաստանի կողմից ընդհանրապես չկա՝ չնայած հակառակ կողմից այդպիսի հայտարարություններ են արվում, որ մենք իբր թե պատրաստվում ենք նման գործողությունների: Մենք Հայաստանի Հանրապետությունում ապրող մարդիկ ենք, և բոլորս էլ տեսնում ենք, որ իրականում մենք այլ աշխատանքով ենք զբաղված, որը միտված է մեր երկրի պաշտպանունակությունը մեծացնելուն։ Դրան զուգահեռ, իհարկե, մենք զբաղվում ենք մեր տնտեսության և առօրյա խնդիրների լուծմամբ: Միանշանակ է, որ մենք պետք է շարունակենք մեր քաղաքականությունը խաղաղություն հաստատելու համար, և այն քայլերը, որոնք հիմա կատարվում են, միտված են միայն դրան: Թե որքանո՞վ կստացվի, ես հիմա չեմ ցանկանում կանխատեսումներ անել, և դրա կարիքն էլ չկա, որովհետև դա ի վերջո արդյունքի է բերելու, և մենք կարողանալու ենք հասնել նրան, որ հարևան բոլոր երկրների հետ ապրելու ենք խաղաղ, բարիդրացիական պայմաններում»,-նշեց ՀՀ նախագահը:
Նախագահը նշեց, որ այն, ինչ տեղի է ունենում Հարավային Կովկասում և դրանից դուրս, մեկ անգամ ևս հուշում է, որ ավելի լավ է թեկուզ մի փոքր երկար գործընթացի արդյունքում, բայց հասնել վերջնական խաղաղության, քան թե դրանով չզբաղվել և մի օր ուղղակի արթնանալ և տեսնել, որ գտնվում ես պատերազմական վիճակում: «Դա իշխանության ներկայացուցիչների ամենօրյա աշխատանքն է, որն առաջնահերթ է, խլում է ռեսուրսներ, բայց ի վերջո մենք նաև դրա համար ենք, որ կարողանանք այդ հարցերը լուծել»,- ընդգծեց ՀՀ նախագահը։
