Իրանի իշխանությունները շուտով պատասխան կուղարկեն ԱՄՆ նախագահ Դոնալդ Թրամփի՝ Իսլամական Հանրապետության գերագույն առաջնորդ այաթոլլա Ալի Խամենեիին ուղղված նամակին։ Այս մասին հայտարարել է Իրանի արտգործնախարար Աբբաս Արաղչին։
«Մենք հաստատ ուղղակի բանակցություններ չենք վարի ճնշման, սպառնալիքների և պատժամիջոցների ուժեղացման պայմաններում: Բանակցությունները պետք է ընթանան հավասար պայմաններով: Մենք կպատասխանենք Թրամփի նամակին մոտ օրերս և կուղարկենք այն համապատասխան ուղիներով», - ասել է նա Իրանի պետական հեռուստատեսությամբ և ռադիոյով:
Ինչպես նշել է Արաղչին, Թրամփի նամակը «սպառնալիքներ է պարունակում»։ «Բայց դրանում նաև նշվում է, որ կան նաև հնարավորություններ, մենք տեսնում ենք և՛ սպառնալիքներ, և՛ հնարավորություններ»,- հավելել է դիվանագետը։
Թրամփը բազմիցս սպառնացել է Իրանին ռազմական ուժով, եթե Թեհրանը համաձայնության չգա Վաշինգտոնի հետ Իրանի միջուկային ծրագրի շուրջ։
