Եմենի «Անսար Ալլահ» շարժման հութի ապստամբները 72 ժամվա ընթացքում իրենց չորրորդ հարվածն են հասցրել Կարմիր ծովում ամերիկյան USS Harry Truman ավիակիր նավին՝ կանխելով արաբական հանրապետության վրա ավիահարվածը։ Այս մասին իր Telegram ալիքում հայտնել է հութիների կողմից ստեղծված զինված ուժերի ներկայացուցիչ Յահյա Սարիան։
Նրա խոսքով՝ հարձակումն իրականացվել է մի քանի թեւավոր հրթիռների և անօդաչու թռչող սարքերի միջոցով։
«Պաղեստինի ճնշված ժողովրդին աջակցելու մեր գործողությունները վերսկսելուց հետո հութիի զինված ուժերը Կարմիր ծովում հայտնաբերեցին թշնամու ռազմական ակտիվություն, որը պատրաստվում էր լայնածավալ օդային ագրեսիա իրականացնել մեր երկրի դեմ:
Ի պատասխան՝ հրթիռային ուժերը, ռազմածովային ուժերը և անօդաչու թռչող սարքերի համար պատասխանատու ստորաբաժանումները համատեղ գործողություն են իրականացրել՝ օգտագործելով մի քանի թեւավոր հրթիռներ և անօդաչու թռչող սարքեր, որոնք թիրախավորել են ամերիկյան ավիակիր USS Harry Truman, ինչը հանգեցրել է հակառակորդի պլանների խափանմանը և ագրեսիայի ձախողմանը։ Գործողության ընթացքում բոլոր նպատակները հաջողությամբ իրականացվել են»,- ասել է Սարիան։
