Փետրվարին Եվրամիությունը պատժամիջոցներ չի կիրառել ռուսական հեղուկացված բնական գազի դեմ, քանի որ Բրյուսելը ակնկալում է Վաշինգտոնի հետ նախնական համաձայնություն ձեռք բերել ամերիկյան LNG մատակարարումների վերաբերյալ։ Այս մասին գրում է Politico-ն։
ԱՄՆ-ի հետ գազային գործարք կնքելու ԵՄ-ի փորձերը սահմանափակված են դաշինքի պատժամիջոցների քաղաքականությամբ։ «Երբ փետրվարին ԵՄ-ն ընդունեց Ռուսաստանի դեմ պատժամիջոցների նոր փաթեթը, պաշտոնյաները չներառեցին LNG-ի արգելքը՝ չնայած անդամ երկրների կողմից աճող ճնշումներին:
Դրա պատճառը ԱՄՆ նախագահ Դոնալդ Թրամփի հետ շարունակվող բանակցություններն էին. ԵՄ-ն չէր ցանկանում ռուսական վառելիքի պաշտոնական արգելք առաջարկել, քանի դեռ գործարք չի կնքել Վաշինգտոնի հետ»,- գրում է հրատարակությունը։
Միաժամանակ, ԵՄ-ն հետաձգել է ռուսական էներգառեսուրսներից հրաժարվելու, այսպես կոչված, ճանապարհային քարտեզի հրապարակումը։
Պատճառներից մեկն էլ ԱՄՆ-ի հետ գազային գործարքի բացակայությունն էր։ «Ճանապարհային քարտեզում մենք առաջընթաց ունենք, այն պատրաստվում է, սակայն ժամանակային շրջանակը փոխվել է վերջին աշխարհաքաղաքական իրադարձությունների պատճառով», - հրատարակությանը հայտնել է Եվրահանձնաժողովի աղբյուրը։
