Բելգիայի Դաշնային խորհրդարանի պատգամավոր Միշել դը Մաեգդը մարտի 13-ին Ներկայացուցիչների պալատում լսումների ժամանակ իր ելույթում մտահոգություն է հայտնել Բաքվում հայ գերիների նկատմամբ անցկացվող շինծու դատավարությունների և գերիների կյանքին սպառնացող վտանգի վերաբերյալ։
Բրյուսելում «Արմենպրես»-ի թղթակցի փոխանցմամբ՝ Միշել դը Մաեգդը, դիմելով Բելգիայի արտաքին գերատեսչության ղեկավարին, ուշադրություն է հրավիրել այն փաստի վրա, որ Բաքվի ռեժիմն ու բռնապետ Ալիևը անտեսում են միջազգային և մարդասիրական բոլոր իրավունքները։
«Պատկերացրեք՝ մի օր Բելգիայում ներխուժում է լինում հարևան երկրի կողմից, որը ղեկավարվում է բռնապետի կողմից, որը, անտեսելով միջազգային և մարդասիրական իրավունքները, ստիպում է բոլոր բելգիացիներին փախչել այլ երկիր: Եվ այդ ընթացքում այդ բռնապետը առևանգում է ձեզ՝ որպես արտաքին գործերի նախարար, ամիսներ շարունակ պահում է բանտում, տանջում և դատում կեղծ դատավարության ընթացքում՝ մի լեզվով, որին դուք նույնիսկ չեք տիրապետում, մեղադրելով ձեզ աբսուրդ կանխակալության մեջ։
Անհավանական սցենար, սիրելի գործընկերներ, կասեք դուք: Բայց, պարոն նախարար, դա հենց այն է, ինչ հիմա տեղի է ունենում ձեր պաշտոնակցի հետ»,- ասել է նա՝ մանրամասնելով, որ Բաքվում ապօրինի դատավարություն է իրականացվում Լեռնային Ղարաբաղի արտաքին գործերի նախկին նախարար Դավիթ Բաբայանի հետ, որին Բաքուն բանտարկել է՝ սարսափելի պատերազմի հետևանքով Լեռնային Ղարաբաղը բռնազավթելուց հետո։
Նա նշել է, որ այդ ագրեսիան դատապարտվել է Արդարադատության միջազգային դատարանի կողմից։
«Այսօր արդեն 470 օր է, ինչ Բաքուն բանտարկել է 23 գերիների, ձեր գործընկերներին, պաշտպանության նախարարին, պետական նախարարներին, ինչպես նաև ԼՂ երեք նախկին նախագահներին», - ասել է Միշել դը Մագդը և դրան ԵՄ-ի՝ մինչ օրս ցուցաբերած արձագանքը գնահատել չափազանց թույլ։
«Արձագանքը թույլ է, քանի որ նրան անհրաժեշտ է ադրբեջանական գազը։ Սա անվերջ կեղծավորություն է, քանի որ բոլորը գիտեն, որ այդ գազի մեծ մասը գալիս է Ռուսաստանից, որը պաշտոնապես գտնվում է էմբարգոյի տակ։ Եվ այս ամենի գագաթնակետն այն է, որ COP 29-ը կազմակերպվեց հենց Բաքվում՝ առանց որևէ ուշադրության այս ռազմագերիների ողբերգության նկատմամբ։ Նրանցից մեկը, սիրելի գործընկերներ, Ռուբեն Վարդանյանն է, խաղաղության մարդ, որն անցյալ տարի առաջադրվել է Նոբելյան խաղաղության մրցանակի համար։ Նրա կյանքը վտանգված է։ Մեր աչքի առաջ 23 գերիների կյանքը հարցականի տակ է։», - հավելել է պատգամավորը։
Միշել դը Մագդը նշել է, որ բելգիացի խորհրդարանականներն արդեն ամիսներ շարունակ դադարեցրել են հարաբերությունները իրենց ադրբեջանցի գործընկերների հետ՝ Բելգիայի կառավարությանը կոչ անելով օգտագործել ձեռքի տակ եղած լծակները, հատկապես համոզել եվրոպացի գործընկերներին՝ պատժամիջոցներ կիրառել Բաքվի դեմ։
«Ես մտահոգված եմ, քանի որ վերջին ժամերին հանդիպել եմ տարածաշրջանի մի քանի դեսպանների և բազմաթիվ վերլուծաբանների հետ։ Բոլոր նշանները ցույց են տալիս, որ Բաքուն պատրաստվում է նոր պատերազմի Հայաստանի դեմ։ Ադրբեջանը Իսրայելից մեծ քանակությամբ զենքերով բեռնված ինքնաթիռներ է բերում։ Հիմա այլևս ժամանակ չկա հապաղելու կամ «փափուկ» դիվանագիտություն վարելու։ Ես վստահ եմ, պարոն նախարար, որ դուք կգործեք։ Որովհետև, ինչպես Ուկրաինայում, այստեղ նույնպես խոսքը մեր արժեքների մասին է», - դիմելով Բելգիայի արտաքին գործերի նախարարին՝ իր ելույթն ավարտել է Դաշնային խորհրդարանի պատգամավոր Միշել դը Մագդը։
