Եմենի «Անսար Ալլահ» շարժման հութիները կվերսկսեն հարձակումները Իսրայելի հետ կապված նավերի վրա Կարմիր և Արաբական ծովերում՝ փորձելով ճնշում գործադրել հրեական պետության վրա՝ վերականգնելու մարդասիրական օգնության մատակարարումները Գազայի հատված:
Այս մասին հայտարարել է ապստամբների կողմից ստեղծված զինված ուժերի ներկայացուցիչ Յահյա Սարիան։
«Միջնորդներին տրված վերջնաժամկետի ավարտի կապակցությամբ՝ ճնշում գործադրելու իսրայելական թշնամու վրա՝ անցակետեր բացելու և Գազայի հատված մարդասիրական օգնություն հասցնելու համար, Եմենի զինված ուժերը հաստատում են Կարմիր և Արաբական ծովերի օպերատիվ գոտում, ինչպես նաև Բաբ ալ-Մանդեբի նեղուցով և Ադենի ծոցով իսրայելական բոլոր նավերի անցման արգելքի վերսկսումը»,- ասել է Սարիան հութիներին պատկանող «Ալ Մասիրա» հեռուստաալիքի եթերում։
Ինչպես նշել է «Անսար Ալլահ»-ի ռազմական ներկայացուցիչը, որոշումն ուժի մեջ է մտնում «այս հայտարարության հրապարակման պահից» և ուժի մեջ կմնա այնքան ժամանակ, քանի դեռ Իսրայելը մարդասիրական օգնություն մատակարարելու համար անցակետ չի բացել Գազայի հատվածի սահմանին։
