Լեսոտոյի արտաքին գործերի նախարար Մպոջոան Լեջոնեն ասել է, որ վիրավորված է ԱՄՆ նախագահ Դոնալդ Թրամփի խոսքերից, թե «ոչ ոք երբեք չի լսել» Լեսոտոյի մասին։
Ավելի վաղ Թրամփը, ելույթ ունենալով ԱՄՆ Կոնգրեսում, ասել էր, որ միլիոնավոր դոլարներ են ծախսվել հարավաֆրիկյան Լեսոտո երկրում ԼԳԲՏ -ներին աջակցելու համար, որի գոյության մասին «ոչ ոք երբեք չի լսել»։
Լեսոտոյի արտգործնախարարը վիրավորական է անվանել ամերիկյան նախագահի այս արտահայտությունը։ «Ես իսկապես ցնցված եմ, որ ամերիկյան պետության ղեկավարն իմ երկիրն այդպես է անվանում: Լեսոտոն այդքան նշանակալից և եզակի երկիր է աշխարհում:
Ես ուրախ կլինեմ նախագահին հրավիրել, ինչպես նաև ողջ աշխարհին գալ Լեսոտո»,- ասել է նա Reuters-ին։ Նախարարը հավելել է, որ ԱՄՆ-ը նույնպես ներգրավված է երկրի առողջապահության և գյուղատնտեսության ոլորտների ֆինանսավորման մեջ։
Լեսոտոն արդեն զգացել է ԱՄՆ ֆինանսավորման կրճատումների ազդեցությունը, քանի որ առողջապահության ոլորտը կախված է դրանից, բայց կառավարությունը ուղիներ է փնտրում ավելի ինքնաբավ դառնալու համար, ասաց նա:
