Սիրիայում նոր քաղաքական ուժերի իշխանության գալը մեծ կորուստ էր լիբանանյան շիական «Հեզբոլլահ» շարժման համար, քանի որ այն վնասեց Իսրայելի դեմ ուղղված տարածաշրջանային դաշինքների համակարգին։ Նման կարծիք է հայտնել «Հեզբոլլահի» հիմնադիրներից մեկը և այս կուսակցությունից Լիբանանի խորհրդարանի պատգամավոր Ալի Ֆայադը։
«Կասկած չկա, որ Սիրիայում քաղաքական վերափոխումը լուրջ ռազմավարական կորուստ է, մենք չենք կարող դա հերքել», - ասել է պատգամավորը Responsible Statecraft-ին տված հարցազրույցում։
«Մեր նախկին հարաբերությունները Բաշար ալ-Ասադի ռեժիմի հետ կապված էին մեկ կոնկրետ հարցի հետ՝ տարածաշրջանային բարդ պայքարում Իսրայելի հետ առճակատման մեջ հավասարակշռություն հաստատելու անհրաժեշտության հետ»,- ասել է շիա քաղաքական գործիչը։
Նրա խոսքով, «սիրիական նոր ղեկավարության դիրքորոշումն Իսրայելի նկատմամբ շփոթեցնող է և շատ հարցեր է առաջացնում, քանի որ Իսրայելը մտավ սիրիական տարածք և օկուպացրեց այն առանց նոր իշխանությունների կողմից որևէ հակազդեցության, սա տարօրինակ է իրավական և քաղաքական տեսակետից, սա ոչ մի այլ երկրում չեք տեսնի»:
2024 թվականի նոյեմբերի վերջին զինված ընդդիմադիր խմբավորումները լայնածավալ հարձակում են սկսել սիրիական բանակի դիրքերի դեմ։ Դեկտեմբերի 8-ին նրանք մտան Դամասկոս, Ասադը հրաժարական տվեց նախագահի պաշտոնից ու լքեց երկիրը։
