Ռուսաստանի արտաքին հաստատություններում անվտանգության միջոցների ուժեղացումն անհրաժեշտ է, դրա համար արտաքին գործերի նախարարությունը միջոցներ է ձեռնարկում, ասել է ՌԴ նախագահի մամուլի քարտուղար Դմիտրի Պեսկովը։
«Իհարկե, դա անհրաժեշտ է, և, իհարկե, դիվանագիտական գերատեսչության միջոցով ձեռնարկվում են բոլոր անհրաժեշտ միջոցները, որպեսզի ընդունող կողմի ուշադրությունը հրավիրվի անվտանգության բոլոր միջոցների ուժեղացման անհրաժեշտության վրա։
Ընդհանուր առմամբ, արտաքին գործերի նախարարության մեր գործընկերներն արդեն ասել են ամեն ինչ»,- ասել է Պեսկովը՝ պատասխանելով Մարսելում ՌԴ գլխավոր հյուպատոսության տարածքում տեղի ունեցած պայթյունի և այլ երկրներում ռուսական դիվանագիտական ներկայացուցչությունների անվտանգության միջոցների ուժեղացման մասին լրագրողների հարցին։
Երկուշաբթի օրը պայթյուն է որոտացել դիվանագիտական ներկայացուցչության մոտ։ Ֆրանսիական լրատվամիջոցների փոխանցմամբ՝ անհայտ անձինք հյուպատոսության այգի են նետել երկու մոլոտովի կոկտեյլ։
ՌԴ ԱԳՆ պաշտոնական ներկայացուցիչ Մարիա Զախարովան ՌԻԱ Նովոստիին ասել է, որ Մարսելում ՌԴ գլխավոր հյուպատոսության տարածքում տեղի ունեցած պայթյունները ահաբեկչության բոլոր նշաններն ունեն, և ռուսական կողմը պահանջում է Ֆրանսիայից միջոցներ ձեռնարկել ռուսական առաքելության անվտանգությունն ուժեղացնելու համար։
