Իրավական առումով Տիրան Խաչատրյանին ներկայացված մեղադրանքը փուչ է, իսկ կալանքը պատժի տարրեր է պարունակում՝ առանց դատավճռի, «Փաստինֆո»-ին ասել է ԶՈՒ ԳՇ պետի նախկին տեղակալ, գեներալ-լեյտենանտ Տիրան Խաչատրյանի պաշտպան Արմեն Անդրիկյանը։
Ինչպես հայտնի է՝ հունվարի 4-ին ձերբակալվել, ապա՝ կալանավորվել է Տիրան Խաչատրյանը։ Նրան մեղադրանք է առաջադրվել 44-օրյա պատերազմի օրերին՝ ռազմական դրության ընթացքում, իր ծառայողական պարտականությունների կատարման նկատմամբ իբրև անփույթ վերաբերմունքի համար, որն առաջացրել է ծանր հետևանքներ, սակայն գեներալ-լեյտենանտը մեղադրանքը չի ընդունում։
Արմեն Անդրիկյանը «Փաստինֆո»-ի հետ զրույցում հայտնել է՝ գործն ուղարկվել է Սյունիքի մարզի ընդհանուր իրավասության դատարան, սակայն դեռևս առկա չէ տեղեկություն՝ մակագրման վերաբերյալ։ Կալանավորման որոշման դեմ բողոքի վերաբերյալ որոշման հրապարակումը, պաշտպանի գնահատմամբ, անհայտ և անհասկանալի պատճառներով հետաձգվել է ։ Ընդ որում, հետաձգման վերաբերյալ գրավոր փաստաթուղթ չի ներկայացվել, պաշտպանին այդ մասին հայտնել են բանավոր։ Քրեական վարույթը քննվում է 2020թ․-ից, հինգ տարի նախաքննություն է իրականացվել, 2025թ․ հունվարին Տիրան Խաչատրյանին ձերբակալել են՝ կալանավորման ներկայացնելու համար, կալանավորել՝ հիմքում դնելով այն հանգամանքը, թե «ակտիվ քննչական գործողություններ» պետք է իրականացնեն, իսկ կալանավորումից մեկ-երկու օր հետո քննչական գործողություններ են իրականացվել՝ չորս անձի հետ առերեսում է իրականացվել, հետո գործն ուղարկել դատարան։
«Տիրան Խաչատրյանը 1,5 ամիս նստած սպասում է, որ գործն ուղարկեն դատարան, մինչդեռ կալանավորման հիմքում դրել էին, որ պետք է ակտիվ քննչական գործողություններ իրականացվեն»,- ասել է փաստաբանը։
Նա չի մանրամասնել, թե կոնկրետ ում հետ է իրականացվել առերես հարցաքննությունը, միայն նշել է՝ ՊՆ-ի՝ այդ օրերի հարավային խմբավորումների սպայական ղեկավար կազմն է, նրանց մի մասը շարունակում է ծառայությունը ՊՆ-ում։ Քրեական գործով այլ ցուցմունքներ ևս կան, սակայն վարույթն իրականացնող մարմինը գտել է, որ պետք է չորս անձանց հետ առերեսումներ տեղի ունենան։
Մինչև ձերբակալությունն՝ այս հինգ տարիների ընթացքում Տիրան Խաչատրյանի մասնակցությամբ բազմաթիվ քննչական գործողություններ են իրականացվել, փաստաբանի փոխանցմամբ՝ վկայի կարգավիճակով ավելի քան տասն անգամ հարցաքննվել է՝ նույն հանգամանքների վերաբերյալ։
«Այնպես չէ, որ այդ հանգամանքները նախկինում անհայտ են եղել, հիմա հայտնվեցին։ Ավելի քան տասն անգամ հարցաքննվել է, դրանից հետո որևէ գործողություն չի իրականացվել, հիմա՝ վերջին պահին ձերբակալել են, կալանավորել, գործն ուղարկում են դատարան»,- ասել է փաստաբանը։
Ի՞նչ խնդիր էին լուծում այդ պայմաններում կալանավորելով․ փաստաբանը նշել է՝ կալանքը պատժի տարրեր է պարունակում՝ առանց դատարանի՝ օրինական ուժի մեջ մտած դատավճռի։
«Իրավական առումով՝ որևէ խնդիր ես չեմ տեսնում՝ լուծման համար»,- ասել է նա։
Փորձում են պատերազմում պարտության մեղքը բարդել գեներալների վրա՞․ փաստաբանը զերծ է մնացել գնահատականներից, միայն ընդգծել է՝ իրավական առումով այդ մեղադրանքը փուչ է։
Դատաքննությունից պաշտպանության կողմի ակնկալիքները մեծ են, սակայն փաստաբանը կարևորում է, որ դատաքննությունը դռնբաց լինի։
«Այնպես չլինի, որ ձևական առումով ասեն՝ ռազմական կամ պետական գաղտնիք է պարունակում, դռնփակ անցկացնեն։ Մենք վստահ ենք Տիրան Խաչատրյանի անմեղության վրա, վստահ ենք, որ դա հաստատվելու է, բայց դրա ճանապարհը շատ ավելի հեշտ կանցնենք, եթե դատաքննությունն անցնի դռնբաց և հասարակությունը տեղեկացվի, թե ինչ է տեղի ունեցել»,- ասել է Անդրիկյանը։
