Իրանի արտաքին գործերի նախարար Աբբաս Արաղչին Իսլամական Հանրապետության պատվիրակության գլխավորությամբ ժամանել է Բեյրութ՝ Լիբանանի իշխանությունների հետ բանակցություններ վարելու նպատակով։ Այս մասին հայտարարել է Իրանի գերատեսչության պաշտոնական ներկայացուցիչ Էսմայիլ Բաղայը։
«Մենք հենց նոր վայրէջք կատարեցինք Բեյրութի միջազգային օդանավակայանում: Մեր պատվիրակությունը՝ արտաքին գործերի նախարար Աբբաս Արաղչիի գլխավորությամբ, կհանդիպի Լիբանանի իշխանությունների ներկայացուցիչների հետ»,- ասել է Բաղայը X-ում: Նրա խոսքով՝ իրանական պատվիրակության այցի շրջանակներում Լիբանան կտեղափոխվի մարդասիրական օգնության խմբաքանակ, որը բաղկացած է սննդից ու դեղորայքից։
«Իրանը միշտ կկանգնի Լիբանանի խիզախ ժողովրդի կողքին, ողջ տարածաշրջանը պետք է հասկանա Լիբանանի առջև ծառացած իրավիճակի լրջությունը և դրա հետևանքները մեր երկրների ժողովուրդների համար», - ընդգծել է ԱԳՆ խոսնակը։
