Աննախադեպ լարված իրավիճակ՝ Մերձավոր Արևելքում․ ինչո՞ւ Իսրայելը Գուտերեշին անցանկալի անձ ճանաչեց (տեսանյութ)

Օր օրի ավելի է լարվում իրավիճակը Մերձավոր Արևելքում։ Մի կողմից՝ պաշտոնական Թեհրանն է հայտարարություններ անում, թե այն երկրները, որոնք Թել Ավիվին օդային սահման կտրամադրեն, Իրանի համար թշնամական պետություններ կհամարվեն։ Սրա համատեքտում էլ Իսրայելն է խոստանում վրեժխնդիր լինել Իրանից իր տարածքի վրա հարձակումների համար։ Ի վերջո, ի՞նչ է կատարվում Մերձավոր Արևելքում, արդյո՞ք Իսրայելն ուզում է աշխարհը երրորդ համաշխարհային պատերազմի մեջ ներքաշել։ Լրագրող Սագօ Արեանը Լուրեր․com-ի հետ զրույցում անդրադարձել է Մերձավոր Արևելքում տիրող իրավիճակին ու ներկայացրել վերջին օրերի արյունալի դեպքերը։Իրան –Իսրայել նոր պատերազմի հավանականությունը բացառում է լրագրողը։ Իրանի վերջին հրթիռակոծություններից հետո, Արեանի դիտարկմամբ, երկու կողմերն էլ հասկանում են, որ Մերձավոր Արևելքում նոր ու մասշտաբային պատերազմ սկսվել չի կարող։  «Երեկ որոշակի տեղաշարժ նկատեցինք Լիբանանի հետ սահմանին։ Իսրայելի ցամաքային ուժերը փորձեցին ինչ-որ դիրքերում ամրանալ կամ էլ ներխուժել Լիբանան։ Վերջին տվյալները ցույց են տալիս, որ նրանք չհաջողեցին։ Ընդհակառակը՝ ունեցան մեծաթիվ կորուստներ» ,- ընդգծեց նա ու հավելեց՝ Բեյրութի հարավային հատվածներում իրավիճակը շարունակում է  պայթյունավտանգ մնալ։ Իսրայելն անընդհատ է հարվածում այս հատվածներին։«Մարդկային առումով Բեյրութն աղետալի իրավիճակում է հայտնվել, մեծաթիվ փախստականներ տարհանվել են դեպի մայրաքաղաք։ Սրվել է ֆինանսատնտեսական իրավիճակը»,- ասաց նա։Երեկ հայտնի դարձավ, որ ՄԱԿ-ի գլխավոր քարտուղար Անտոնիո Գուտերեշին Իսրայելում անցանկալի անձ է ճանաչվել։ Հարց է առաջանում՝ ինչո՞ւ Իսրայելը նման քայլի դիմեց, մի՞թե սա Իսրայելի ապտակն էր՝ ուղղված ՄԱԿ-ին։ Գուտերեշն, Արեանի կարծիքով, ամիսներ շարունակ քննադատողական արտահայտություններ է հնչեցնում Իսրայելի ցեղասպան քաղաքականության դեմ։ Այդ իսկ պատճառով էլ դիմել է այս քայլին։«Իմ դիտարկմամբ՝ նման լարում Իսրայելի կառավարության և ՄԱԿ-ի միջև նախկինում երբեք տեղի չի ունեցել։ Սա աննախադեպ քայլ էր Իսրայելի կողմից» ,- շեշտեց Արեանը։Անդրադառնալով Թուրքիայի նախագահ  Ռեջեփ Թայիփ Էրդողանի մեկնաբանությանն՝ Իսրայելի հրթիռակոծվելու հետ կապված, որում նշել էր, թե Իսրայելի ագրեսիան ներառում է նաև Թուրքիան, և, որ իրենք այս պետական ​​ահաբեկչությանը դիմակայելու են իրենց  հասանելի բոլոր միջոցներով, Արեանը նկատեց՝ Թուրքիան միշտ էլ երկակի խաղ է խաղացել։ Մի կողմից ռազմական ու էներգետիկ համագործակցությունները, մյուս կողմից էլ բացահայտ կերպով քննադատում է Իսրայելի և այդ երկրի  վարչապետ Բենիամին Նեթանյահուի վարած քաղաքականությունը։Հիշեցնենք, որ Իսրայելի և Լիբանանի միջև հերթական էսկալացիան սկսվել է սեպտեմբերի 17-ին և 18-ին Լիբանանի տարբեր շրջաններում կապի միջոցների զանգվածային պայթյուններից հետո, որոնց հետևանքով տասնյակ մարդիկ են զոհվել, երեք հազար քաղաքացի վիրավորվել է: Ավելի ուշ իսրայելական ավիացիան հարվածել է Բեյրութի հարավային արվարձանում գտնվող բնակելի շենքին, ինչի հետևանքով զոհվել է ավելի քան 50 մարդ, այդ թվում՝ «Հզբոլլահի» հատուկ գործողությունների ուժերի հրամանատար Իբրահիմ Աքիլը:Շիական դիմադրության մարտիկներն ի պատասխան հարձակվել են Իսրայելի ՌՕՈւ «Ռամաթ-Դավիդ» բազայի և Հայֆայի հյուսիսում գտնվող «Ռաֆայել» ռազմարդյունաբերական համալիրի վրա: Մի քանի հրթիռ է պայթել իսրայելական քաղաքի ծայրամասերում գտնվող բնակելի թաղամասերում։ՀԱՐՑԱԶՐՈՒՅՑՆ ԱՄԲՈՂՋՈՒԹՅԱՄԲ՝ ՏԵՍԱՆՅՈՒԹՈՒՄՍԻԼՎԻ ՄՈՒՐԱԴՅԱՆ