ԱՄՆ նոր նախագահ Դոնալդ Թրամփի որոշումը՝ մաքսատուրքեր սահմանել կանադական ապրանքների վրա, կարող է երկրի տնտեսությունը գցել ռեցեսիայի մեջ: Այս մասին հաղորդում է Globe and Mail թերթը՝ վկայակոչելով Կանադայի թագավորական բանկի զեկույցը և վերլուծաբանների կանխատեսումները, փոխանցում է ՏԱՍՍ-ը: ԱՄՆ-ի և Կանադայի միջև գալիք մաքսային պատերազմը կարող է «ամենալուրջ ցնցումը» լինել երկու երկրների միջև առևտրային հարաբերությունների համար 1930-ականներից ի վեր։ Տնտեսագետները նաև զգուշացնում են, որ այս ֆոնին Կանադայի գործազրկության մակարդակը, որը ներկայումս կազմում է 6,7%, կարող է աճել։
Մոնրեալի բանկի գլխավոր տնտեսագետ Դագ Փորթերը կարծում է, որ Կանադան բախվում է «չափավոր ռեցեսիայի» արդեն 2025 թվականին։
«RSM Canada» խորհրդատվական ընկերության գործընկեր Թու Նգուենն իր հերթին կարծում է, որ 2025 թվականին երկրի տնտեսությունը կարող է նվազել 2%-ով։ Այս դեպքում անկման սանդղակը կգերազանցի 1,8 տոկոսի կանխատեսումը, որ արել էին փորձագետները՝ նախքան Թրամփի կողմից մաքսատուրքեր մտցնելը։
