ՄԱԿ-ի գործակալությունները կրճատում են հումանիտար աջակցության միջազգային ծրագրերն այն բանից հետո, երբ ԱՄՆ իշխանությունների կողմից դադարեցվեց օգնության տրամադրումն այլ երկրներին, այս մասին հաղորդում է բրիտանական The Guardian պարբերականը՝ վկայակոչելով ՄԱԿ-ի փախստականների հարցերով գերագույն հանձնակատարի գրասենյակի (ՄԱԿ ՓԳՀ) ղեկավար Ֆիլիպո Գրանդիի՝ աշխատակիցներին ուղարկված էլեկտրոնային նամակը։
Ավելի վաղ Սպիտակ տունը հաղորդել էր, որ ԱՄՆ նախագահ Դոնալդ Թրամփը հրամանագիր է ստորագրել, ըստ որի 90 օրով դադարեցվում է զարգացման նպատակներով օգնության տրամադրումն այլ երկրներին՝ գնահատելու այդ ծրագրերի համապատասխանությունը ԱՄՆ արտաքին քաղաքականությանը։
Նշվում է, որ Գրանդին էլեկտրոնային նամակ է ուղարկել աշխատակիցներին՝ կարգադրելով անհապաղ սահմանափակել ծախսերը, այդ թվում՝ 90 օրով հետաձգել նոր մատակարարումների պատվերները, բացի արտակարգ դեպքերից, սառեցնել աշխատանքի ընդունումը և պայմանագրերի կնքումը, ինչպես նաև դադարեցնել բոլոր միջազգային օդային ճամփորդությունները, մինչ փախստականների հարցերով գրասենյակը փորձում է հարմարվել ԱՄՆ-ի կողմից ֆինանսավորման սառեցմանը։
The Guardian-ը նշում է, որ Վաշինգտոնի միջոցառումների պատճառով ամբողջ աշխարհում հումանիտար օգնության ծրագրերը դանդաղել են, սկսվել են աշխատակիցների հեռացումներ։Հրատարակության տվյալներով՝ 2024 թվականին Վաշինգտոնը ՄԱԿ ՓԳՀ-ին հատկացրել է շուրջ 2,49 միլիարդ դոլար, որը կազմել է գրասենյակի ընդհանուր բյուջեի մեկ հինգերորդ մասը։
