ԱՄՆ նախագահ Ջո Բայդենի հեռացող վարչակազմը խստացնում է կիբերանվտանգության պատժամիջոցները Իրանի, Չինաստանի և Ռուսաստանի կողմից հաքերային հարձակումների և ենթադրյալ սպառնալիքների պատճառով: Այս մասին լրագրողների համար հատուկ առցանց ճեպազրույցում ասել է ԱՄՆ նախագահի ազգային անվտանգության հարցերով օգնականի տեղակալ Անն Նայբերգերը։
Նրա խոսքով` գործադիր հրամանը, որը կստորագրի վարչակազմի ղեկավարը, պարունակում է դրույթ «պետությունների, շորթողների և կիբերտարածության այլ չարամիտ ուժերի դեմ պատժամիջոցների ավելի լայն և պարզեցված կիրառման համար, որոնք սպառնում են Միացյալ Նահանգների և դաշնակիցների ազգային անվտանգությանը»։
Միևնույն ժամանակ, նախագահի օգնականի տեղակալը պնդել է, որ «ԱՄՆ կառավարությունը, կորպորացիաները և քաղաքացիները գնալով դառնում են հաքերների և «ԱՄՆ-ի հակառակորդ պետությունների կիբերհարձակումների զոհ»:
